सध्या ‘बिग बॉस ओटीटी’चं नवीन पर्व अधिक चर्चेत आहे. या शोमध्ये युट्यूबर, सोशल मीडिया इन्फ्ल्युएन्सर, कलाकार अशा अनेक क्षेत्रातील लोक सहभागी झाले आहेत. काही जणांच्या एंट्रीने जनता नाराज झाल्याचेही पाहायला मिळाले आहे. युट्यूबर अरमान मालिक व त्याच्या दोन्ही पत्नी हे देखील या शोमध्ये सहभागी झालेले पाहायला मिळत आहेत. अशातच त्यांच्या कौटुंबिक कलहाचे अनेक पैलू आता या कार्यक्रमाच्या निमित्ताने पाहायला समोर येत आहेत. कार्यक्रमाच्या पहिल्याच दिवशी तिघांनीही त्यांची प्रेमकहाणी सगळ्यांना सांगितली होती. मात्र आता एक नवीन माहिती समोर आली आहे. (payal malik on armaan malik )
अरमान व त्याची पत्नी पायल मलिक व कृतिका मलिक यांनी ‘बिग बॉस ओटीटी’च्या तिसऱ्या पर्वात सहभाग घेतला आहे. यामध्ये आता त्याची पहिली पत्नी पायलने कृतिकाबरोबर झालेल्या दुसऱ्या लग्नाबाबत भाष्य करताना दिसत आहे. ती हे बोलतानाचा एक व्हिडीओदेखील सोशल मीडियावर व्हायरल झाला आहे. या व्हिडीओमध्ये ती पती व कृतिकाविषयी बोलताना दिसत आहे.
समोर आलेल्या व्हिडीओमध्ये पायलने कृतिका व अरमान एकदा एकत्र बाहेर गेले होते आणि तिथेच त्यांनी लग्न करण्याचा निर्णय घेतला. दोघेही लग्न करुन परत आहे आणि नंतर फोन आला ज्यामध्ये काहीतरी चांगली बातमी असल्याचे सांगितले. याबद्दल सांगताना ती म्हणाली की, “एकदा मी बाहेर होते आणि कृतिका व अरमान एकत्र फिरायला गेले होते. दोघेही लग्न करुन आले. त्याआधी मला एक फोन आला. फोनवर सांगितले की पायल एक आनंदाची बातमी सांगायची आहे. मी यांना चांगली ओळखत असल्याने मी म्हणाले की मला माहीत आहे तुम्ही लग्न केले आहे ते”.
‘बिग बॉस ओटीटी’मधील सर्व घरातील मंडळी पायलची गोष्ट ऐकत होते. यावेळी कृतिका व अरमान तिथेच बसले होते. तिथे असलेल्या मुनीषा खटवानीने पायलला शांत केले आणि तिला विचारले की, “तुझ्या जवळच्या मैत्रिणीने तुझ्याच पतीबरोबर लग्न केले आणि तुला धोका दिला. ही तुला मोठी गोष्ट वाटत नाही का?”. हे सगळं ऐकून उपस्थित असेलेल्या सगळ्यांनी पायलला धीर दिला आणि काळजी न करण्यास सांगितले.