After Marriage Pooja Birari Post : अभिनेत्री पूजा बिरारी आणि सोहम बांदेकर यांच्या विवाहसोहळ्याची जोरदार चर्चा मनोरंजनविश्वात रंगल्यानंतर आता पूजा पुन्हा आपल्या कामावर परतली आहे. ‘येड लागलं प्रेमाचं’ मालिकेतून प्रचंड लोकप्रियता मिळवणारी पूजा बिरारी आता बांदेकर कुटुंबाची सून बनली आहे. लोणावळ्यात २ डिसेंबर २०२५ रोजी थाटामाटात झालेल्या लग्नानंतर मुंबईमध्ये नुकताच त्यांचा रिसेप्शन सोहळा पार पडला आहे. या रिसेप्शन सोहळ्यात कलाकार आणि राजकीय नेते यांची सुद्धा उपस्थिती पाहायला मिळाली.
लग्नसोहळ्यानंतर थोडा ब्रेक घेऊन पूजा आता पुन्हा सेटवर परतली आहे. शूटिंगला परतल्याचा आनंद तिने सोशल मीडियावर व्यक्त केला. सेटवरून शेअर केलेल्या तिच्या पहिल्या फोटोमध्ये अभिनेत्री नीना कुलकर्णीसहच्या तिच्या गप्पांची झलक पाहायला मिळाली. फोटोमध्ये पूजाच्या हातात कॉफी कप असून, सेटवरील खास ‘कॉफी मोमेंट’चा तिने आनंद व्यक्त केला आहे. “माझी कॉफी पार्टनर… आणि आमच्या दादांनी बनवलेली खास कॉफी याला म्हणतात सेटवरचं खरं सुख” अशा शब्दांत तिने सेटवरील आनंददायी वातावरणाबद्दल सांगितलं आहे.
‘येड लागलं प्रेमाचं’ मालिकेच्या सेटवर झालेल्या केळवण समारंभात पूजाने सोहमच्या नावाचा उखाणा घेत प्रेमाची कबुली दिल्यानंतर या नात्याला आणखी स्पष्टता मिळाली होती. त्यांच्या नात्याची ही गोड सफर आता विवाहात परिवर्तित झाली असून, लग्नानंतर पूजा पुन्हा कामाला लागल्याने तिच्या चाहत्यांचा उत्साह आणखी वाढला आहे. आता पूजा ‘येड लागलं प्रेमाचं’च्या सेटवर पुन्हा आली असल्याने मालिकेत तिच्या भूमिकेत कोणते नवे ट्विस्ट येणार याची चाहत्यांना उत्सुकता लागून राहिली आहे.
