‘बाहुबली’ या चित्रपटातील भल्लालदेव या भूमिकेने जगात लोकप्रियता मिळवलेला अभिनेता राणा दग्गुबतीबद्दल एक मोठी बातमी समोर येत आहे ती म्हणजे, राणा दग्गुबती, अभिनेता व्यंकटेश आणि त्यांच्या कुटुंबातील काही सदस्यांवर गुन्हा दाखल करण्यात आला आहे. हैदराबाद पोलिसांनी रविवारी दाक्षिणात्य अभिनेता व्यंकटेश, याशिवाय व्यंकटेश यांचा भाऊ अन् निर्माता सुरेश दग्गुबती, सुरेश यांचा मुलगा व अभिनेता राणा दग्गुबती याशिवाय दग्गुबती परिवारातील आणखी काही सदस्यांवर गुन्हा दाखल केला आहे. मात्र हे नेमकं काय आहे? ज्यामुळे अभिनेता अडचणीत आला आहे, जाणून घेऊया… (rana daggubati case filled)
हैदराबाद येथील फिल्म नगर भागात डेक्कन हॉटेलविषयी हे प्रकरण आहे. दग्गुबाती कुटुंबाने फिल्म नगर येथे त्यांची जमीन नंद कुमार या व्यक्तीला भाड्याने दिली होती. नंद कुमार हा एक व्यावसायिक असून तो त्या जागेवर ‘डेक्कन किचन’ नावाचं हॉटेल चालवत होता. काही दिवसांपूर्वी नंदकुमार आणि दग्गुबती कुटुंब यांचे संपत्तीबद्दल मोठे वाद झाले. त्यामुळे कायदेशीर कारवाईही झाली. त्यानंतर नंद कुमारने दग्गुबती परिवारावर आरोप केला की, दग्गुबती परिवाराने चोरी केली. याशिवाय ज्युबली हिल्समधील प्रॉपर्टीचं नुकसानही केलं.
आणखी वाचा – ब्रेन स्ट्रोक आल्यानंतर टिकू तलसानियांची तब्येत कशी? लेकीने दिली मोठी माहिती, म्हणाली, “माझे पप्पा…”
दिवाणी न्यायालय आणि तेलंगणा उच्च न्यायालयाच्या आदेशाचं दग्गुबती कुटुंबाने उल्लंघन केल्याचा आरोप त्याने केला आहे. दग्गुबती परिवाराने अवैधपणे प्रवेश करुन असामाजिक तत्त्वांची मदत घेऊन प्रॉपर्टीचं नुकसान केलं, असं नंद कुमारचं म्हणणं आहे. नामपल्ली कोर्टाने शनिवारी पोलिसांना एफआयआर नोंदवण्याचे निर्देश दिले आणि या प्रकरणाची चौकशी करण्यास सांगितले.
त्यानुसार, पोलिसांनी ४४८, ४५२,४५८ आणि १२०बी या कलमांअंतर्गत गुन्हा दाखल केला आहे. त्यामुळे आता या सर्व प्रकरणी अभिनेता व त्याच्या कुटुंबियांवर पुढे काय कार्यवाही होणार? हे लवकरच पाहायला मिळेल. सध्या पोलीस या प्रकरणाचा तपास करत आहेत. राणा-व्यंकटेश आणि दग्गुबती परिवारातील इतर सदस्यांची यामुळे चौकशी होण्याची शक्यता आहे.
