कलाकारांचं कलेवर असणारं प्रेम, श्रद्धा आणि निष्ठा नक्की काय असते? हे सुप्रसिद्ध अभिनेता अमोल बावडेकरने सगळ्यांना दाखवून दिलं. काही दिवसांपूर्वीच ‘सुंदर मी होणार’ नाटकाच्या प्रयोगाआधी अमोलच्या बाबतीत एक वेगळीच घटना घडली. प्रयोगापूर्वीच त्याला हृदयविकाराचा झटका आला. मात्र या संपूर्ण घटनेमध्ये त्याचं कलेवर असणारं प्रेम तो विसरला नाही. नाटकाचा प्रयोग रद्द होऊ नये म्हणून अमोलने डॉक्टरांकडे चक्क तीन तास मागितले. मात्र त्याची परिस्थितीच गंभीर असल्यामुळे डॉक्टरांनी त्यासाठी नकार दिला. यामधून अमोलची त्याच्या कामाप्रती असलेली निष्ठा, प्रेम दिसून आलं. आता तो रुग्णालयामधून घरी परतला आहे. (Avinash Narkar meet amol bawdekar)
हृदयविकाराचा झटका आल्यानंतर अमोलला लगेचच रुग्णालयात नेण्यात आलं. परिस्थिती पाहता अँजिओग्राफी करण्याचा सल्ला डॉक्टरांनी दिला. अँजिओग्राफी झाल्यानंतर अमोल पुन्हा सुखरुप घरी परतले आहेत. ‘सुंदर मी होणार’ नाटकाचे दिग्दर्शक राजेश देशपांडे यांनी अमोलबाबत संपूर्ण माहिती दिली होती. आता अमोलला भेटण्यासाठी अभिनेते अविनाश नारकर त्यांच्या घरी गेले होते. यादरम्यानचा व्हिडीओ त्यांनी इन्स्टाग्राम स्टोरीद्वारे शेअर केला.
अविनाश त्यांचा मित्र अमोलला भेटण्यासाठी घरी पोहोचले. यावेळी त्यांनी अमोल अगदी ठणठणीत असल्याचं सांगितलं. अविनाश म्हणाले, “बघताय ना अमोल अगदी मस्त, ठणठणीत आणि बरा आहे. आता १ जुलैपासून तो पुन्हा कामाला सुरुवात करणार आहे. मगाशी तो इतका हसत होता की, त्याची पत्नी त्याला ओरडली. बस्स आता सांगितलं”. अविनाश यांनी अमोलच्या तब्येतीबाबतची खुशखबर चाहत्यांनाही दिली.
तसेच व्हिडीओला त्यांनी एक सुंदर कॅप्शनही दिलं. “देवा माझ्या या डार्लिंगला कोणाचीही नजर लागू देऊ नकोस”. अमोल आणि अविनाश दोघंही अगदी खास मित्र आहेत. ‘सुंदर मी होणार’ नाटकाचे प्रयोग अमोल पुन्हा नव्या जोमाने करणार आहे. तर झी मराठी वाहिनीवरील ‘तुला जपणार आहे’ मालिकेतही तो महत्त्वाच्या भूमिकेत दिसेल. पण सध्या काही दिवस अमोल घरी आराम करणार आहे.
