‘आई कुठे काय करते’ या मालिकेतील अनघा म्हणजेच अश्विनी महांगडेने अल्पावधीतच प्रेक्षकांच्या मनाचा ताबा घेतला. अभिनेत्री अश्विनी महांगडेला या मालिकेतील तिच्या भूमिकेमुळे चांगलीच लोकप्रियता मिळाली. मालिकेबरोबरच अश्विनी चित्रपटातूनही अधूनमधून भेटीस येत असते. ‘महाराष्ट्र शाहीर’ चित्रपटातील तिच्या भूमिकेचंही बरंच कौतुक झालं. शिवाय अश्विनी चर्चेत असते ते तिच्या पारंपारिक वेशातील फोटोशूटमुळे. काही महिन्यांपूर्वी अश्विनीच्या खऱ्या जोडीदाराचे फोटो समोर आले होते. (Ashvini Mahangade Birthday)
अशातच आज अश्विनीच्या वाढदिवसानिमित्त तिच्या खऱ्या आयुष्यातील जोडीदाराने तिला सोशल मीडियावरून पोस्ट शेअर करत शुभेच्छा दिल्या आहेत. अश्विनीबरोबरचा एक व्हिडीओ पोस्ट करत त्याने कॅप्शन देत म्हटलं आहे की, “या आपल्या आठ वर्षांच्या प्रवासात खुप चढ-ऊतार, सुख-दुखः पाहीले, खुप लोकांचा सहवास लाभला, काहींनी जोडून ठेवले तर काहींनी तोडले पण त्यातूनही कायम राहिले ते आपण ८ वर्षांपूर्वी जोडलेले नातं. आईने सांगितल्याप्रमाणे माणूस नेहमी मोठा असायला हवा आणि ते कायम जपायला हवे. नानांना दिलेल्या शब्दांपासून कधी मागे हटणार नाही, कायम तुझ्या बरोबर आहे. वाढदिवसाच्या खुप शुभेच्छा बछडी, लव्ह यु. खुप मोठी हो. तिला बोलायला आवडते आणि मला ऐकायला” असं कॅप्शन दिलं आहे.
“आधार देणाऱ्याचे मन निर्मळ असावे आणि ते अनेक संकटांमधून गेल्यावरच समजते…” असे कॅप्शन देत अश्विनीने काही दिवसांपूर्वी तिच्या जोडीदाराबरोबरचे फोटो शेअर करत एक पोस्ट शेअर केली आहे. तिला आधार देत कायम तिची साथ करणाऱ्या या तिच्या जोडीदाराचे नाव आहे नीलेश जगदाळे. नीलेश हे फार्मफ्रेश ऑरगॅनिकचे मालक आहेत. याबरोबरच त्यांनी अश्विनीसोबत मिळून ‘फ्लाइंग एन्जल लेट्स फ्लाय’ ही कंपनी देखील सुरू केली आहे. तसेच ‘रयतेचे स्वराज्य’ प्रतिष्ठानचे ते सदस्यही आहेत तिथे अश्विनीही सदस्य आहे.
आज अश्विनीच्या वाढदिवसानिमित्त निलेश यांनी खास पोस्ट करत अश्विनीला शुभेच्छा दिल्या आहेत. त्यांच्या या पोस्ट वर अनेक चाहत्यांनीही अश्विनीला वाढदिवसानिमित्त शुभेच्छा दिल्या आहेत. तर निलेशच्या या पोस्टवर अश्विनीने कमेंट करत ‘लव्ह यु बाबा’ असं म्हटलं आहे.