‘रात्रीस खेळ चाले’ मालिकेमुळे अभिनेत्री अपूर्वा नेमळेकर नावारुपाला आली. ‘बिग बॉस मराठी’मध्ये सहभागी झाल्यानंतर तिच्या चाहतावर्गामध्ये आणखीनच भर पडली. सध्या ती झी मराठी वाहिनीवरील ‘प्रेमाची गोष्ट’ मालिकेमध्ये महत्त्वाची भूमिका साकारत आहे. कलाक्षेत्रात पुढे जात असताना काही महिन्यांपूर्वी अपूर्वा व तिच्या कुटुंबियांवर दुःखाचा डोंगर कोसळला. अपूर्वाचा धाकटा भाऊ ओमकार नेमळेकरचं निधन झालं. भावाच्या निधनानंतर अपूर्वा पूर्णपणे कोलमडून गेली होती. आता तिने भावासाठी भावुक पोस्ट शेअर केली आहे.
एप्रिल महिन्यामध्ये हृदयविकाराच्या झटक्यामुळे ओमकारचं निधन झालं. तो अवघ्या २८ वर्षांचा होता. ओमकारचा ७ ऑक्टोबरला वाढदिवस असतो. याचनिमित्त अपूर्वाने त्याच्याबरोबरचे काही फोटो पोस्ट करत जुन्या आठवणींना उजाळा दिला. तसेच ओमकारच्या वाढदिवसाला करत असलेली मजा-मस्ती तिने सगळ्यांपर्यंत शेअर केली. यावेळी भावाची सतत आठवण येत असल्याचंही अपूर्वा म्हणाली.
अपूर्वाने म्हटलं, “प्रिय ओम, दरवर्षी ७ ऑक्टोबर हा दिवस मजेशीर आणि उत्साहाने भरलेला असायचा. आपल्या बालपणी तुझ्या वाढदिवसादिवशी घरीच केक बनवण्याची तयारी, कपडे खरेदी करणं, सजावट याची धावपळ असायची. जसजसे आपण मोठे होत गेलो तसं आवडत्या हॉटेलमध्ये जाऊन खायचं आणि धमाल करायची. यादरम्यान खूप मजा आली. आपण आठवणींचा अल्बम बनवला. पण तू खूप लवकर स्वर्गामध्ये गेलास. तुझ्याशिवाय आयुष्य अपूर्ण आहे”.
“मला आशा आहे की, स्वर्गामधून तू आमच्याकडे हसतमुखाने बघत असशील. आज आम्ही तुझ्या आठवणी अधिक जपतो आणि त्यामध्ये रमतो. तुझी आठवण येणं सोपं आहे. पण तुला गमावल्याचं दुःख कधीच कमी होणार नाही. माझ्या प्रिय भावा, तुला वाढदिवसाच्या खूप शुभेच्छा. भविष्यामध्ये एक दिवस तू आणि मी पुन्हा एकत्र येऊ. आम्हाला तुझी खूप आठवण येते. आय लव्ह यू बाळा”. अपूर्वाच्या या पोस्टनंतर चाहत्यांनी तिच्या भावाला वाढदिवसाच्या शुभेच्छा दिल्या आहेत.