सध्या सोशल मीडियावर ‘पुष्पा २’ या चित्रपटाची चर्चा रंगलेली पाहायला मिळत आहे. चित्रपट प्रदर्शनापूर्वीच सर्वत्र चित्रपटाची चर्चा सुरु आहे. या चित्रपटातील सामी सामी हे गाणं तुफान व्हायरल होताना दिसत आहे. रश्मिका मंदांना आणि अल्लू अर्जुनच्या या गाण्याने आणि डान्स स्टेपने साऱ्यांना भुरळ घातली आहे. ही डान्स स्टेप प्रचंड व्हायरल झाली असून अनेकांनी ही स्टेप फॉलो करत रील शेअर केले आहेत. तर कलाकार मंडळींनाही या गाण्याने भुरळ घातलेली पाहायला मिळत आहे. (sairaj kendre sami sami dance)
पारू या मालिकेतील कलाकारांनी या गाण्यावर केलेला डान्स चर्चेत राहिला. तर यानंतर आता ‘अप्पी आमची कलेक्टर’ या मालिकेतील कलाकारांनाही सामी सामी गाण्याची भुरळ पडली आहे. मालिकेतील सर्वांचा लाडका बालकलाकार साईराज केंद्रे म्हणजेच अमोल उर्फ सिंबालाही ‘पुष्पा २’ चित्रपटाच्या गाण्याने वेड लावलं आहे. या गाण्यावर साईराजने केलेली रील व्हिडीओ सध्या तुफान व्हायरल होत आहे. याआधीही साईराज ‘माझ्या पप्पांनी गणपती आणला’, या गाण्यावरील डान्समुळे चर्चेत आला होता.
साईराजचा सोशल मीडियावरही खूप मोठा चाहतावर्ग आहे. साईराजने सामी सामीवर केलेला डान्स प्रेक्षकांच्या पसंतीस पडला असून या व्हिडीओवर नेटकरी कमेंट करत त्याचं कौतुक करताना दिसत आहेत. साईराज हा उत्तम डान्सर असून त्याला नृत्याची आवड आहे. अगदी हुबेहूब हुक स्टेप फॉलो करत त्याने हा व्हिडीओ शेअर केला आहे. नृत्यासह साईराजने आजवर त्याच्या अभिनयानेही प्रेक्षकांची मन जिंकली आहेत.
सध्या साईराज ‘अप्पी आमची कलेक्टर’ या मालिकेत महत्त्वपूर्ण भूमिका साकारताना दिसत आहे. अप्पी व अर्जुनमध्ये आलेला दुरावा दूर करण्यासाठी अमोल प्रयत्न करताना दिसत आहे. मालिकेतील अमोलच्या भूमिकेचं आणि अभिनयाचंही चाहते कौतुक करताना दिसत आहेत. प्रेक्षकांना साईराजला छोट्या पडद्यावर पाहणंही रंजक ठरत आहे.
