सध्या टेलिव्हिजनवर ‘अनुपमा’ या मालिकेने तुफान लोकप्रियता मिळवली आहे. जवळपास ५०% लोक ही मालिका पाहतात. या मालिकेचा टीआरपीदेखील प्रचंड प्रमाणात वाढत आहे. या मालिकेतील सर्व पात्रांनी प्रेक्षकांच्या मनात एक वेगळी जागा निर्माण केली आहे. यातील मुख्य पात्र अनुपमा म्हणजे रुपाली गांगुलीने आपला एक वेगळा चाहतावर्ग निर्माण केला आहे. मालिकेतील तिच्या संवादाने तिच्या लोकप्रियतेमध्ये अधिकच वाढ झालेली पाहायला मिळत आहे. पण काही दिवसांपूर्वी रुपाली खूप चर्चेत आली होती. त्यावरुन तिच्याबद्दल सर्वच स्तरामध्ये चर्चा सुरु झाली होती. आता त्यावर खुद्द रुपालीने मौन सोडले असून त्यामागची कारणे सांगितली आहेत. (rupali ganguly on airport video)
काही दिवसांपूर्वी रुपालीचा एअरपोर्टवरील एक व्हिडीओ व्हायरल झाला होता. यामध्ये ती तिच्या पतीच्या पायाला स्पर्श करुन आशिर्वाद घेताना दिसत आहे. जेव्हा हा व्हिडीओ व्हायरल झाला त्यानंतर तिच्या चाहत्यांनी प्रचंड नाराजी दर्शवली. मालिकेमध्ये महिला सक्षमीकरणाबद्दल सांगून, महिलांबद्दल आदर अशा गोष्टी सांगणारी अनुपमा खऱ्या आयुष्यामध्ये एकदम विरुद्ध आहे. या टीकेवर आता अनुपमाने चाहत्यांना उत्तर दिले आहे.
त्याबद्दल तिने एका मुलाखतीमध्ये सांगितले की, “माझे पती आर्थिकदृष्ट्या खूप सक्षम आहेत. ते असताना मला काम करण्याची काहीही गरज नाही. ते आमचा सगळ्यांचा खूप चांगला सांभाळ करु शकतात. पण असे असतानादेखील त्यांनी मला या क्षेत्रामध्ये काम करण्याची संधी दिली तसेच मला प्रेरणादेखील दिली. ते आमच्या घराचे मुख्य आहेत. त्यामुळे मी नेहमीच त्यांच्या पाया पडून त्यांचा आशिर्वाद घेते”.
पुढे ती म्हणाली की, “आमचे कितीही भांडण झाले तरीही मी दुसऱ्या दिवशी उठून त्यांच्या पाया पडते. मी त्यांचा खूप आदर करते आणि त्यांच्याव खूप प्रेमदेखील करते”.
रुपालीने २००० साली ‘सुकन्या’ या मालिकेतून मालिकाविश्वामध्ये पदार्पण केले. तसेच तिने ‘साराभाई व्हर्सेस साराभाई’ या सुप्रसिद्ध मालिकेतील तिच्या भूमिकेलाही प्रेक्षकांचे खूप प्रेम मिळाले. दरम्यान ती आता ‘अनुपमा’च्या माध्यमातून तिला खूप प्रसिद्धी मिळत आहे.