छोट्या पडद्यावरील लोकप्रिय मालिकांमध्ये गणली जाणारी मालिका म्हणजे स्टार प्रवाहवरील ‘आई कुठे काय करते’. आणि या मालिकेमुळे घराघरात पोहोचलेली लाडकी अरुंधती म्हणजे अभिनेत्री मधुराणी प्रभूलकर. मालिकेतील मधुराणीच्या पात्राला प्रेक्षकांनी अक्षरशः डोक्यावर घेतला असून तिची विशेष फॅन फॉलोविंग निर्माण झाली आहे. मधुराणी सोशल मीडियावर सक्रिय असून ती या माध्यमातून अनेक व्हिडिओज व फोटोज तिच्या चाहत्यांसमोर शेअर करत राहते. असाच एक व्हिडिओ तिने नुकतंच शेअर केला असून तिच्या या व्हिडिओची सर्वत्र चर्चा होत आहे. (Madhurani Prabhulkar AKKK)
मधुराणी सध्या मालिकेच्या शूटिंगमध्ये व्यग्र असून तिने शूटवरील एक व्हिडिओ तिच्या इंस्टाग्राम अकाउंटवर पोस्ट केला आहे. या व्हिडिओमध्ये मधुराणी घाटात चारचाकी गाडी चालवताना दिसत असून यावेळी तिला आलेला अनुभव या व्हिडिओबरोबरच्या पोस्टमध्ये शेअर केला आहे. मधुराणी या पोस्टमध्ये म्हणते, “रोज नवीन काहीतरी शिकत असतो आपण…! गाडी चालवायला आवडतेच मला. पण तशी उशीरा शिकले चालवायला … अलिकडेच म्हणायला हवं. गाडी येणं ह्याचे अनेक फायदे वेळोवेळी अनुभवले. पण अशी कधी गाडी चालवू असा विचारही केला नव्हता.”
हे देखील वाचा – “तुझी लाज वाटते”, नाचतानाचा व्हिडीओ शेअर केल्यामुळे अंकिता लोखंडे ट्रोल, नेटकरी म्हणाले, “वडील जाऊन महिनाही झाला नाही आणि…”
“रिंग, कॅमेरा, आणि घाटातला प्रवास… त्यात घाटात गाडी सांभाळायची, संवाद म्हणायचे, इमोशन्स सांभाळायच्या, रस्त्यावरचं लक्ष ढळू द्यायचं नाही.. ही तारेवरची कसरत होती. सुरुवातीला जरा भीती वाटली पण नंतर मजा यायला लागली. भीतीची भावना पार केली तरच अनुभव गाठीशी गोळा होतात. नाहीतर आपण तिथेच राहतो, नाही का !” असं मधुराणी यात म्हटली आहे. तिच्या या पोस्टवर चाहत्यांनी प्रतिक्रियांचा पाऊस पाडला आहे.
हे देखील वाचा – मराठमोळ्या गायिकेला मिळाली सचिन तेंडुलकरसमोर गाण्याची संधी, अनुभव शेअर करत म्हणाली, “समोरच्या व्यक्तीचा आदर करणं…”
मधुराणी प्रभूलकरला चारचाकी वाहने चालवण्याची प्रचंड आवड असून याआधीच्या व्हिडिओमधून तिने तिचे वाहनप्रेम दाखवलं आहे. याबरोबरच ती युट्युब चॅनेलमधून तिच्या कविता चाहत्यांसमोर सादर करत असते. तर ‘आई कुठे काय करते’ बाबत बोलायचे झाल्यास मालिका आता वेगळ्याच वळणावर आलेली आहे. ईशाचं लग्न झाल्यानंतर अरुंधती आशुतोशसोबत हनिमूनला निघालेले असतात. मालिकेत आता रोमँटिक ट्रॅकवर आली असून पुढील भागात प्रेक्षकांना काय पाहायला मिळणार, हे पाहणे औत्सुक्याचे ठरणार आहे.