मराठी मनोरंजन सृष्टीतील लोकप्रिय अभिनेत्रींपैकी एक अभिनेत्री म्हणजे रूपाली भोसले. सध्या ‘आई कुठे काय करते’ या मालिकेतील अभिनयाने तिने प्रेक्षकांची मनं जिंकली. रुपाली सोशल मीडियावर बरीच सक्रिय असते. तिचा सोशल मीडियावर बराच मोठा चाहतावर्ग आहे. ती आयुष्यातील घडामोडीसंबंधीत फोटो, व्हिडीओ सोशल मीडियावर शेअर करत असते. नुकतीच तिने कोल्हापूरातील जागृक देवस्थान देवी अंबाबाईबद्दलचा एक अनुभव सोशल मीडियावर शेअर केला आहे. सध्या ‘स्टार प्रवाह’ वाहिनीचा गणेशोत्सव सोहळा साजरा होत आहे. यासाठी विविध कार्यक्रमांचे आयोजन करण्यात आले. या कार्यक्रमात रुपालीने एका खास नृत्याचे सादरीकरण करणार आहे. हे सादरीकरण तिच्यासाठी खूप खास ठरलं असल्याचं तिने पोस्ट शेअर करत सांगितलं. ही पोस्ट सोशल मीडियावर सगळ्यांचे लक्ष वेधून घेत आहे.(rupali bhosle shared her divine experience)
रुपालीने पोपटी रंगाच्या साडीमध्ये फोटो शेअर केला आहे. ही पोस्ट शेअर करताना तिने लिहीलं, ‘कोल्हापूर नगरातील श्री महालक्ष्मी मंदिर हे ५२ शक्तिपीठांपैकी एक आहे. तसेच ते महाराष्ट्रातील साडेतीन शक्तिपीठांपैकी एक आहे. या पीठाचा उल्लेख पुराणांमध्येही आढळतो. माझा जन्म मार्गशीर्ष महिन्यातल्या शेवटच्या गुरुवारी झाला. मला आई बोलली की बाकी कोणतेही उपवास केले नाही तरी मार्गशीर्ष महिन्यातले गुरुवार नक्की करायचे. पण मी आजपर्यंत जमेल तसे बाकीचे उपवास तर करतेच पण हे गुरुवारचे उपवासही करते. जन्म झाला तेव्हा आई-बाबांना लक्ष्मी घरात आली असं वाटत असेल का? हा प्रश्न मला कायम पडायचा. पण माझ्या आईबाबांनी कायम मला लक्ष्मी सारखंच वागवलं. देवीआईचा आशीर्वादही माझ्या कायम माझ्या पाठीशी आहे व नेहमी असेल. ‘स्टार प्रवाह’च्या एका कार्यक्रमासाठी कोल्हापूरला गेले होते. पण महालक्ष्मीचं दर्शन घेता आलं नाही’.
पुढे रुपाली लिहीते, ‘मनाला खूप त्रास झाला. शेवटी ती आईच! तिला माझ्या मनातली भावना समजली व जणू तिच मला भेटायला आली. या वर्षीच्या ‘स्टार प्रवाह’ गणेशोत्सवाची तालीम करायला गेले. मला सांगितलं की कोल्हापूरची महालक्ष्मी मला साकारायची आहे. मी लगेच माझ्या आईला कॉल केला ही बातमी सांगितलं. हा योगायोग आहे की काय? पण हे सगळं त्या आईनेच केलं असेल असं मला वाटतं. इच्छा शक्ति व मनापासून मारलेली हाक देवापर्यंत पोहोचते हे मात्र खरं आहे. ‘स्टार प्रवाह’चे खरचं खूप आभार. भरभरून लिहीलं आहे गोड मानून घ्या. पहिल्यांदा इतकं लिहीलं वैभव घुगे व टीमचे आभार”, असं म्हणत रुपालीने फोटो शेअर केले आहेत.
नेटकऱ्यांनीही भरभरून कमेंट करत रुपालीच्या फोटोंचं कौतुक केलं आहे. एका नेटकऱ्यांने मी पण मार्गशीर्ष महिन्याच्या शेवटच्या गुरुवारी जन्मले असं म्हणत फोटोवर कमेंट केला. तर दुसऱ्या नेटकऱ्याने परमेश्वर पाठीराखा म्हणत तिच्या अनुभवाला दुजोरा दिला.