नव्वदीच्या काळातील लोकप्रिय अभिनेत्री ऐश्वर्या नारकर यांनी त्यांच्या अभिनयकौशल्याने व त्यांच्या सौंदर्याने रसिक प्रेक्षकांच्या मनावर राज्य केलं आहे. मराठी मालिका, जाहिराती, चित्रपट, नाटकांमधून त्या घराघरांत लोकप्रिय झाल्या. सोशल मीडियावरही अभिनेत्रीचा वावर बऱ्यापैकी मोठा असतो. नेहमीच त्या काही ना काही पोस्ट करत चाहत्यांच्या संपर्कात राहत असतात. सोशल मीडियावर मनमोहक व दिलखेचक फोटो तसेच पती अविनाश नारकर यांच्याबरोबरचे हटके डान्स व्हिडीओदेखील त्या शेअर करत असतात. (Aishwarya Narkar Post)
ऐश्वर्या नारकर यांच्या ट्रेंडिंग रील्सचे चाहते दिवाने आहेत. हटके डान्स करत त्या नेहमीच चाहत्यांच्या संपर्कात राहत असतात. चाहतेही त्याच्या या ट्रेंडिंग रील्सवर गमतीशीर कमेंट करताना दिसतात. ऐश्वर्या सध्या झी मराठी वाहिनी वरील ‘सातव्या मुलीची सातवी मुलगी’ या मालिकेतून प्रेक्षकांचे मनोरंजन करत आहेत. या मालिकेत त्या नकारात्मक भूमिकेत पाहायला मिळत आहेत.
अशातच अभिनेत्री ऐश्वर्या नारकर यांनी सोशल मीडियावरुन त्यांच्या आजच्या जेवणाचा बेत काय आहे याचा एक व्हिडीओ शेअर केला आहे. शेअर केलेल्या व्हिडीओमध्ये त्या आजच्या जेवणाचा मेनू सांगत आहेत. आजच्या जेवणात वरण-भात, मुळ्याची भाजी, ज्वारीची भाकरी व ताक असा आहार असल्याचं व्हिडीओमध्ये पाहायला मिळतंय. ज्वारीची भाकरी ते गॅसवर शेकताना दिसत आहेत. ऐश्वर्या यांच्या रोजच्या जेवणाचा हा व्हिडीओ प्रेक्षकांनी पाहता अनेकांनी यावर कमेंट केल्या आहेत.
ऐश्वर्या यांनी शेअर केलेला हा व्हिडीओ पाहून एका नेटकऱ्याने कमेंट करत, “सॉरी ताई पण हे जे तुम्ही डायरेक्ट गॅसवर भाकरी ठेवताय त्याने कॅन्सर होण्याची शक्यता असते. कृपया तुम्ही तुमची काळजी घ्या कारण मला तुम्ही खूप आवडता” असं म्हटलं आहे. यावर ऐश्वर्या यांनी कमेंट करत “हो मी नक्की या गोष्टी टाळेन” असं त्यांनी म्हटलं आहे.
