अभिनेत्री अमृता खानविलकरने आजवर तिच्या अभिनयकौशल्याने व तिच्या नृत्यकलेने प्रेक्षकांच्या मनावर अधिराज्य गाजवलं आहे. अनेक हिट चित्रपट व मालिकांमधून अमृताने साऱ्यांची मन जिंकली. अमृता नेहमीच तिच्या सोशल मीडियावर बऱ्यापैकी सक्रिय असते. सोशल मीडियाच्या माध्यमातून काही ना काही पोस्ट करत ती चाहत्यांच्या संपर्कात राहत असते. अमृताला विशेष लोकप्रियता मिळाली ती म्हणजे ‘चंद्रमुखी’ चित्रपटातील तिच्या ‘चंद्रा’ या भूमिकेमुळे. (Amruta Khanvilkar With Sister)
अमृता नेहमीच तिच्या कामातून वेळात वेळ काढून स्वतःसाठी स्वतःच्या घरासाठी, कुटुंबासाठी वेळ देताना दिसते. अभिनेत्री तिच्या कुटुंबाबरोबरच बरेचदा वेळ घालवताना दिसते. अमृताचं तिच्या कुटुंबावर विशेष प्रेम असलेलं पाहायला मिळतं. ती तिच्या आईबरोबरचे अनेक फोटो कायमच शेअर करत असते. शिवाय ती तिच्या बहिणीच्या मुलांचेही फोटो व रील्स शेअर करताना दिसते. मात्र अमृताने शेअर केलेल्या एका पोस्टने साऱ्यांचं लक्ष वेधून घेतलं आहे.
अमृताने चक्क ३५ वर्षात पहिल्यांदाच बहिणीबरोबर पहिल्यांदा प्रवास करतानाचा व्हिडीओ शेअर केला आहे. या व्हिडीओमध्ये अमृता व तिची बहीण अदिती परदेशवारीसाठी सज्ज असलेले दिसत आहेत. एअरपोर्टवरील व विमानात बसल्यानंतरचा एक व्हिडीओ अमृताने शेअर केला आहे. व्हिडीओवरुन दोघीही मॉरिशस येथे फिरायला जात असल्याचं समोर आलं आहे. अमृता व अदितीच्या या पहिल्या एकत्र प्रवासात त्यांना निरोप द्यायला त्यांची आई आल्याचंही व्हिडीओमध्ये पाहायला मिळत आहे.
अमृताने हा व्हिडीओ शेअर करत, “आणि अशी सुरुवात झाली आहे. ३५ वर्षात फक्त मी व अदिती पहिल्यांदाच एकत्र प्रवास करत आहोत. अनलिमिटेड मनोरंजनासाठी संपर्कात राहा” असं कॅप्शन देत त्यांनी हा व्हिडीओ शेअर केला आहे. त्यांच्या या व्हिडीओला अनेकांनी पसंती दर्शविली आहे. शिवाय चाहत्यांनी प्रवासादरम्यान काळजी घे अशा कमेंटही केल्या आहेत.