मराठी सिनेसृष्टीतील लोकप्रिय जोडीच्या यादीत एका जोडीचं नाव आवर्जून घेतलं जात ते म्हणजे ऐश्वर्या नारकर व अविनाश नारकर. नारकर कपलची ही जोडी सिनेविश्वात नेहमीच चर्चेत असते. आजवर ऐश्वर्या व अविनाश यांनी मराठी मालिका, चित्रपट यांमध्ये महत्त्वपूर्ण भूमिका साकारत प्रेक्षकांच्या मनावर अधिराज्य गाजवलं आहे. सोशल मीडियावरही दोघेही बऱ्यापैकी सक्रिय असतात. नेहमीच ही जोडी रील व्हिडीओमुळे चर्चेत असते.सोशल मीडियावरुन काही ना काही शेअर करत दोघेही कायम चर्चेत असतात. (avinash-aishwarya narkar sonavinash-aishwarya narkar son)
अशातच अविनाश यांनी त्यांच्या इन्स्टाग्राम अकाउंटवरुन शेअर केलेल्या पोस्टने साऱ्यांचं लक्ष वेधलं आहे. अविनाश यांनी ही पोस्ट त्यांचा लेक अमेयसाठी केली आहे. अमेय या आई-वडिलांसारखा या सिनेसृष्टीत कार्यरत आहे. अभिनय नव्हे तर दिग्दर्शनाची धुरा सांभाळण्यात त्याचा कल आहे. अमेय आता परदेशात शिक्षणासाठी जात असल्याचं समोर आलं आहे. अमेयने परदेशात जाऊन शिक्षण घेणार असून त्यासाठी त्याच्या आई-वडिलांचा म्हणजे ऐश्वर्या व अविनाश यांचा पूर्ण पाठिंबा आहे.
अमेयसाठी खास पोस्ट शेअर करत त्यांनी असं लिहिलं आहे की, “आज आमचा मन्या. आमचा अमेय पुढच्या शिक्षणासाठी अमेरिकेला निघाला. नवनवीन गोष्टी जाणून घेण्याचं व शिकण्याचं तुझ्या डोळ्यातलं, मनातलं कुतुहल असंच कायम जागं राहू दे मन्या. कोणीही दुखावलं जाईल असं काही करु नकोस. कायम आनंदी रहा आणि तुझ्या कामातून सगळ्यांना आनंद दे. आमचे सगळ्यांचं भरभरुन प्रेम व आभाळभर आशीर्वाद कायम तुझ्या पाठीशी आहेतच बब्बु. यशस्वी भव”.
शिवाय आणखी एक व्हिडीओ त्यांनी शेअर केला आहे. या व्हिडीओमध्ये दोघेही लेकाला एअरपोर्टवर सोडायला जाताना दिसत आहेत. “मन्या. बब्बू तुला खूप खूप खूप खूप शुभेच्छा. तुझा हा प्रवास सुरक्षित व यशस्वी होवो”, असं म्हणत त्याला निरोप देताना दिसत आहेत. त्यांच्या या पोस्टवर अनेकांनी अमेयला पुढील वाटचालीसाठी शुभेच्छा दिल्या आहेत. तर काहींनी या पोस्टला पसंती दर्शविली आहे.
