‘बिग बॉस मराठी’चा नवा पर्व सुरु झाला तेव्हापासून सर्वत्र या शोची चर्चा सुरु झाली आहे. अल्पावधीतच हा कार्यक्रम जम बसवू पाहत आहे. ‘बिग बॉस’च्या घरातील १६ स्पर्धक हे एकापेक्षा एक असलेले पाहायला मिळत आहेत. सर्वत्र ‘बिग बॉस’ची चर्चा सुरु आहे. अशातच यंदा ‘बिग बॉस’मध्ये अभिनेता नव्हे तर अनेक रील स्टार, कीर्तनकार, मॉडेल यांनाही संधी मिळाली आहे. यंदाच्या पर्वात रील स्टार सुरज चव्हाण स्पर्धक म्हणून पाहायला मिळत आहे. सोशल मीडिया इन्फ्ल्युएन्सर असलेला सूरज चव्हाणने टिक टॉक आणि त्यानंतर इन्स्टाग्रामवरील रील्सवर आपल्या खास शैलीतील व्हिडीओने धुमाकूळ घातला. (Suraj Chavan Income)
‘गुलिकत धोका’ असे खास आपल्या शैलीत बोलणारा सूरज हा सोशल मीडियावर चांगलाच लोकप्रिय आहे. विनोदी धाटणीच्या व्हिडीओने सूरजच्या रील्सला चांगलाच प्रतिसाद मिळतो. मोबाईलवर रील करणारा सूरजने थेट ‘बिग बॉस’च्या घरात एण्ट्री घेतली तेव्हा साऱ्यांच्या भुवया उंचावल्या. सुरजने ‘बिग बॉस’च्या घरात प्रवेश केला असला तरी त्याचा इथपर्यंतचा प्रवास काही सोपा नव्हता. आई-वडिलांचे छत्र हरपल्यानंतर सूरजचा त्याच्या बहिणींनी सांभाळ केला. शिक्षण घेता घेता मोलमजुरी करत करत त्याने घरची परिस्थिती सांभाळली.
त्यानंतर सूरजला टिक टॉक या अॅपबद्दल कळालं आणि याने त्याचं आयुष्य बदललं. बहिणीच्या मुलाने त्याला टिक टॉक या अॅपची ओळख करुन दिली आणि त्याने बहीणीबरोबर एक व्हिडीओ शेअर केला, जो तुफान व्हायरल झाला आणि हळहळू गांवखेड्यात त्याला प्रसिद्धी मिळू लागली. टिक टॉकवरील व्हिडीओ व्हायरल होत असल्यामुळे त्याला लोकप्रियता मिळू लागली. दरम्यान अनेक कार्यक्रमांच्या, उदघाटनाच्या सुपाऱ्या तो घेऊ लागला. यादरम्यान सूरजने प्रसिद्धीचा पुरेपूर वापर केला. मात्र त्याला त्यावेळी अनेकांनी लुटलं.
या मानधनाबाबत सूरजने ‘बिग बॉस’च्या घरात खुलासा केला आहे. सूरज इतर स्पर्धकांसह बोलताना असं म्हणाला की, “टिकटॉकवेळी मला दिवसाला रिबिन कापायला८०,००० हजार रुपये मिळायचे. त्यावेळी एक दिवसाचे मानधन ८०,००० घ्यायचो. आतापण मी एका दिवसाचे ३० ते ५० हजार घेतो. सुरुवातीला पैसा बघून मला लोकांनी खूप लूटलं. त्यामुळे माझ्या बहिणी मला एकच म्हणतात की, तू फक्त नीट राहा.आम्हाला बरं वाटेल”. सुरजचं मानधन ऐकून इतर स्पर्धकांच्या भुवया उंचावल्या.
