सुट्टी म्हणजे अनेकांचा अत्यंत जिव्हाळ्याचा विषय असतो. सगळ्या सुट्ट्यांचा राजा म्हणजे मे महिन्याची उन्हाळ्याची सुट्टी. सगळ्यांनाच हवीहवीशी वाटणारी उन्हाळ्याची ही सुट्टी अनेकार्थानं खास असते. मे महिन्याच्या सुट्टीत कुठे फिरायला जायचं, याचं प्लॅनिंग कित्येक महिने आधीच झालेलं असतं. कलाविश्वातीलही अनेक कलाकार मंडळीही त्यांच्या व्यस्त कामातून वेळ काढत मे महिन्याच्या सुट्टीमध्ये एन्जॉय करण्यासाठी बाहेर जात असतात आणि या सुट्ट्यांचे काही खास क्षण ते सोशल मीडियाद्वारे शेअर करत असतात.
अशातच अभिनेत्री ऐश्वर्या नारकर व अविनाश नारकर हे मे महिन्यातील सुट्ट्यांचा आनंद घेण्यासाठी फिरायला गेले आहेत. ऐश्वर्या व अविनाश नारकर हे मराठी मनोरंजन क्षेत्रात गेले अनेक वर्ष काम कररत प्रेक्षकांचे मनोरंजन करत आहेत. ऐश्वर्या या सध्या झी मराठी वाहिनीवरील ‘सातव्या मुलीची सातवी मुलगी’ या मालिकेतून प्रेक्षकांच्या भेटीला येत आहेत. तर अविनाश यांच्या मालिकेने नुकताच प्रेक्षकांचा निरोप घेतला. त्यामुळे दोघांनी त्यांच्या व्यस्त वेळातून वेळ काढत सुट्ट्यांचा आनंद घेण्यासाठी पाचगणी येथे गेले आहेत.
ऐश्वर्या यांनी त्यांच्या सोशल मीडियाद्वारे या ट्रीपचे काही खास क्षण शेअर केले असून या व्हिडीओमधून त्यांनी ते राहत असलेल्या ठिकाणचा एक खास व्हिडीओही शेअर केला आहे. ऐश्वर्या यांनी त्यांच्या इन्स्टाग्रामद्वारे शेअर केलेल्या व्हिडीओमध्ये असं म्हटलं आहे की, “आम्ही मुंबईच्या धावपळीपासून काही दिवस शांतता मिळावी म्हणून या ठिकाणी आलो आहोत. आम्ही चार दिवसांच्या या ट्रीपवर आलो असून इथून लोकांशी संवाद साधत आहोत.”
दरम्यान, ऐश्वर्या व अविनाश नारकर हे त्यांच्या अभिनयाने जितके चर्चेत राहत असतात, तितकेच ते सोशल मीडियाद्वारे चाहत्यांच्या संपर्कात राहत असतात, हे दोघेही त्यांचा व्यायाम करताना, फिरताना, मजा-मस्ती करतानाचे सर्व फोटो व व्हिडीओ त्यांच्या चाहत्यांबरोबर शेअर करत असतात आणि चाहत्यांकडूनही त्यांच्या या फोटो व व्हिडीओला चाहत्यांकडून प्रतिसाद मिळत असतो.