काही कलाकार सिनेसृष्टीमध्ये येण्यापूर्वीच सोशल मीडियाच्या माध्यमातून प्रेक्षकांचे लाडके झाले होते. या यादीत बच्चेकंपनीही होतीच. आता ही बच्चेकंपनी सोशल मीडियानंतर मालिकांच्या माध्यमातून छोट्या पडद्यावर प्रेक्षकांचं मनोरंजन करत आहेत. या बालकलाकारांमध्ये एक नाव नक्कीच आवर्जून घेतलं जात ते म्हणजे मायरा वायकुळ. मायरा सोशल मिडियाच्या माध्यमातून प्रेक्षकांच्या घरोघरी पोहोचली. त्यानंतर मायराने मालिकाविश्वातून अभिनयाची छाप प्रेक्षकांवर सोडली. (Myra Vaikul On Ganeshotsav)
मायराच्या घरी ५ दिवसांकरिता बाप्पाचं आगमन झालं होतं. बाप्पाला निरोप देताना ही बालकलाकार भावुक झाल्याचा एक व्हिडीओ सोशल मीडियावर वाऱ्यासारखा पसरला होता. त्यानंतर आता इन्स्टाग्रामवर मायराचा आणखी एक व्हिडीओ व्हायरल होतं आहे. या व्हिडीओमध्ये मायरा तिच्या लाडक्या बाप्पाला गाऱ्हाणं घालताना दिसतेय. सध्या सर्वत्र गणेशोत्सवाची धामधूम पाहायला मिळतेय. कोकणात ही गाऱ्हाणं घालण्याची प्रथा अजूनही सुरूच आहे. बाप्पाला निरोप देताना ही गाऱ्हाणं घालण्याची परंपरा मायरानेही फॉलो केली आहे, असं म्हणणं चुकीचं ठरणार नाही. बाप्पाला निरोप देताना मायराने गाऱ्हाणं घातल्याचा एक व्हिडीओ सोशल मीडियावर चांगलाच व्हायरल होतं आहे.
मायराने “गणपती बाप्पा मोरया! आमच्याकडून काही चुकलं असेल, तर तू आम्हाला माफ कर. आज तुझ्या जाण्याचा दिवस आहे पण, आम्हाला वाटतं तू नको जाऊस. तू गेल्यावर सगळं घर सुनं सुनं वाटतं. म्हणून तू आमच्याकडे नेहमीच राहा अशी आमची इच्छा असते. तुला निरोप द्यायची वेळ आलीये आता, तू हॅपी हॅपी जा आणि पुढच्या वर्षी आमच्याकडे खूप दिवस राहा.” असे बाप्पाकडे गाऱ्हाणं घातलं आहे. मायराने घातलेलं हे गाऱ्हाणं प्रेक्षकांच्या पसंतीस उतरलं आहे.
मायराचा हा व्हिडीओ सोशल मीडियावर तुफान व्हायरल झाला आहे. अनेकांनी मायराच्या या व्हिडिओला पसंती दर्शवत तिच्या या व्हिडिओवर लाईक्सचा वर्षाव केला आहे. तर काहींनी या व्हिडिओवर कमेंट करत मायराचं कौतुक केलं आहे.
