काही दिवसांपूर्वीच अभिनेता श्रेयस तळपदेच्या तब्येतीबाबत धक्कादायक बातमी समोर आली होती. श्रेयसला हृदय विकाराचा झटका आला होता. या आजारपणातून आता श्रेयस बर्यापैकी सावरला असून आता त्याने चित्रीकरणालाही सुरुवात केली आहे. उपचारानंतर बरं झाल्यानंतर आता श्रेयसच्या तब्येतीवरुन त्याचे निधन झाल्याची पोस्ट सोशल मीडियावर व्हायरल होत होती. या निधनाच्या पोस्टवर आता अभिनेत्याने पोस्ट शेअर करत स्पष्टीकरण दिलं आहे. सोशल मीडियावरुन पोस्ट शेअर करत हयात असल्याचं स्पष्टीकरण त्याने दिलं आहे. (Shreyas Talpade Update)
श्रेयसने पोस्ट शेअर करत असं म्हटलं आहे की, “मी जिवंत आहे, आनंदी आहे व निरोगी आहे हेच मी सर्वांना सांगू इच्छितो. माझ्या निधनाची माहिती देणाऱ्या एका व्हायरल पोस्टबद्दल मला कळालं. हा विनोद मी समजू शकतो, पण जेव्हा त्याचा गैरवापर केला जातो तेव्हा खरा त्रास होतो. एखाद्याच्या विनोदातून सुरु झालेली गोष्ट आता अनावश्यक काळजीचं वातावरण निर्माण करत आहे, तसेच माझ्यासाठी काळजी करणाऱ्या लोकांच्या, खासकरुन माझ्या कुटुंबाच्या भावनांशी खेळ होत आहे. माझी लहान मुलगी रोज शाळेत जाते. ती आधीच माझ्या आरोग्याबद्दल काळजीत आहे, ती सतत मला प्रश्न विचारत असते. या खोट्या बातमीमुळे तिची भीती आणखी वाढत आहे. तिला तिच्या शाळेत याबद्दल शिक्षकांकडून, वर्गमित्रांकडून प्रश्न विचारण्यात येत आहेत. तिला आम्ही कुटुंब म्हणून सांभाळण्याचा प्रयत्न करत आहोत”.
पुढे तो असंही म्हणाला आहे की, “अशा पोस्ट करणाऱ्या व फॉरवर्ड करणाऱ्यांनी हे थांबवावं आणि या पोस्टच्या होणाऱ्या परिणामांचा विचार करावा. बऱ्याच लोकांनी माझ्या आरोग्यासाठी मनापासून प्रार्थना केली आहे. लोकांच्या भावना दुखावण्यासाठी विनोदाचा वापर केला जात आहे हे पाहून वाईट वाटतं. कारण या गोष्टी माझ्या जवळच्या लोकांना त्रास देऊ शकतात आणि आमच्या आयुष्यात व्यत्यय आणतात. जेव्हा तुम्ही अशा अफवा पसरवता तेव्हा त्याचा परिणाम फक्त त्या व्यक्तीवर होत नाही तर तिच्या कुटुंबावरही परिणाम होतो. खासकरुन लहान मुलं जे या गोष्टी समजू शकत नाही”.
“ज्यांनी माझी विचारपूस केली, त्या सर्वांचा मी मनापासून आभारी आहे. तुमची काळजी व प्रेमच माझ्यासाठी सर्वकाही आही. ट्रोलर्सला माझी एकच विनंती आहे की कृपया हे सगळं थांबवा. दुसऱ्यांवर असे विनोद करु नका. तुमच्याबरोबरही असं काही घडावं असं मला कधीच वाटणार नाही, त्यामुळे थोडे संवेदनशील व्हा”.
