सध्या बऱ्याच नाटकांचे परदेश दौरे सुरु आहेत. अशातच ‘नियम व अटी लागू’ या नाटकाची टीमही परदेश दौरा करण्यात व्यस्त आहे. परदेशातील नाटकादरम्यानचे अनेक फोटो व्हिडीओ कलाकार मंडळी सोशल मीडियावरून शेअर करत आहेत. या नाटकात अभिनेता संकर्षण कऱ्हाडे मुख्य भूमिकेत पाहायला मिळतोय. संकर्षण एक अभिनेता म्हणून उत्तम आहेच शिवाय तो एक उत्तम निवेदक, गायकही आहे. सोशल मीडियावरून नेहमीच तो काही ना काही शेअर करून चाहत्यांच्या संपर्कात राहत असतो. सध्या संकर्षणचा एक व्हिडीओ सोशल मीडियावर धुमाकूळ घालतोय. (Sankarshan Karhade Viral Video)
संकर्षण कऱ्हाडेने चाहत्यांची मागणी पूर्ण केली आहे. अमेरिकेत दौऱ्यानिमित्त गेलेला संकर्षणला त्याच्या अमेरिकेतल्या चाहत्यांनी धरलं आणि त्याला कविता म्हणून दाखवायला सांगितली. यावेळी त्याने देशावर आधारित कविता चाहत्यांना म्हणून दाखवली. देशाप्रतीचे संकर्षणच हे प्रेम पाहून चाहत्यांच्या मनात त्याच्याबाबतचा आदर अधिक वाढला आहे.
संकर्षणने मराठी प्रेक्षकांच्या विनंतीचा आदर करून देशभक्तीपर कविता म्हणून दाखवली. संकर्षण म्हणाला, “भिन्न भाषा, भिन्न राज्यं वेगवेगळा वेश आहे, संस्कृतीने नटलेला भारत माझा देश आहे. कष्टाचा खातो घास आम्ही, सोन्याचा निघतो घरात धूर, सचिनची बॅट आमची आहे, आमचा आहे लताचा सूर, साहित्य, कला, विज्ञानातही सुवर्ण अक्षर गिरवायचंय अन् येत्या काही वर्षात आम्हाला महासत्ता म्हणून मिरवायचंय. विनंती करतो भावांनो अनावश्यक खिसा भरू नका, चार घास कमी खा…पण, भ्रष्टाचार पुन्हा करू नका. सलोख्याने राहू अशी मनाशी गाठ बांधू, रमजान-दिवाळी साजरी करू आणि आनंदाने नांदू. काय कोणाची बिशाद आता आणि काय कोणात आहे दम मनात ठेवा देशाला अन् म्हणावं ते वंदे मातरम.”
संकर्षणने कविता सादर केल्यानंतर प्रेक्षकांनी संकर्षणचं भरभरून कौतुक केलं. आणि त्याला त्याच्या पुढील वाटचालीसाठी अनेक शुभेच्छा दिल्या. हा व्हिडीओ सध्या चांगलाच व्हायरल होत आहे
