Majjacha Adda with Ashok Saraf : गेले पाच दशक मराठीसह हिंदी सिनेसृष्टीत आपल्या अभिनयाची छाप पाडत प्रेक्षकांच्या मनावर राज्य करणारे सर्वांचेच लाडके अभिनेते म्हणजे अशोक सराफ. वयाच्या पंच्याहत्तरीनंतर देखील आपल्या कामाचे तारुण्य जपत आजही ते अनेकांचे मनोरंजन करताना दिसतात. त्यांच्या लोभस स्वभावामुळे ते सर्वांनाच आपले वाटतात. मात्र अशोक सराफ नेमके कसे आहेत. खऱ्या आयुष्यात ते तितकेच विनोदी आहेत का? लोकांना हवेहवेसे वाटणाऱ्या अशोक मामांबद्दल अनेकांच्या मनात मात्र आदरयुक्त भीती आहे.
अशोक सराफ यांनी इट्स मज्जाच्या मज्जाचा अड्डा या कार्यक्रमात हजेरी लावली होती. यावेळी स्वतःच्या स्वभावाच्या दुसऱ्या बाजुबाबत बोलताना अशोक मामा म्हणाले की, “मी प्रेक्षक व चाहत्यांशी जोडला गेलेलो आहे आणि महत्त्वाचं म्हणजे लोकांनी मला आपलसं केलं आहे. प्रेक्षकांना जे आवडेल तेच मी आतापर्यंत करत आलो आहे. मी आतापर्यंत कोणत्याही प्रकारची फालतुगीरी केलेली नाही. अश्लीलतेच्या बाजूनेही कधी गेलो नाही. ज्याच्यामधून लोकांना मजा येईल अशी शुद्ध, सरळ कॉमेडी मी केली” असं ते म्हणाले.
स्वतःच्या स्वभावाबाबत बोलताना ते पुढे म्हणाले, “लोकांचं मनोरंजन करणं हाच माझा हेतू राहिला आहे. एरव्ही मी अधिक बोलत नाही. कारण जास्त बोलणं हा माझा स्वभाव नाही. मी गप्प बसतो त्यामुळेही लोकांचा गैरसमज होतो. हा बोलत नाही यांच्याकडे कसं जायचं असा विचार लोक करतात. पण मी गप्प बसतो. काही कारण नसताना मला घाबरतात. मी काहीही केलेलं नसतं. पण लोक मला घाबरतात तेही कित्येकदा बरं असतं. कारण आतापर्यंत मला काय काय ऐकायला लागलं असतं सांगता येत नाही. आम्ही कॉमेडी भूमिका करणारे नट”.
त्यांच्याबद्दलच्या आदरयुक्त भीतीबाबत ते पुढे, “विनोदी कलाकार म्हटलं की, लोकांना असं वाटतं की हा आपल्यातलाच आहे. पण माझ्याबाबत असं काही घडू नये म्हणून मला तसं राहायला लागतं. माझे जे खास लोक आहेत त्यांच्याबरोबर मी नेहमीच विनोदी असतो. ‘व्हॅक्युम क्लिनर’ माझं नाटक आहे. या नाटकाच्या आधी स्टेजवर खेळीमेळीचं वातावरण असतं. यामुळे ज्येष्ठ कलाकार म्हणून इतर कलाकारांच्या मनात माझ्याबाबत जी भीती असते ती निघून जाते. आणि कामही अगदी उत्तम होतं”, असंही म्हणाले.