मराठी, हिंदी मनोरंजनसृष्टीतील जेष्ठ अभिनेत्री सीमा देव यांचं आज राहत्या घरी निधन झालं आणि संपूर्ण कलाविश्वावर शोककळा पसरली. प्रदीर्घ काळापासून अल्झायमर या आजाराने सीमा ह्या त्रस्त होत्या. आज (२४ ऑगस्ट २०२३) रोजी त्यांनी राहत्या घरी अखेरचा श्वास घेतला. सीमा देव यांच्या जाण्याने मराठी मनोरंजनसृष्टीतील अनेक कलाकारांनी श्रद्धांजली वाहिली आहे.(Ashok Saraf on Seema Deo Death)
सीमा देव यांच्या निधनाच्या बातमीमुळे अभिनेते अशोक सराफ देखील भावुक झालेले पाहायला मिळाले. ABP माझाशी संपर्क साधत अशोक सराफ यांनी त्यांच्या भावना व्यक्त केल्या. सीमा देव याना श्रद्धांजली वाहत अशोक सराफ म्हणाले “अत्यंत वाईट गोष्ट झाली की, एक देखणी सुंदर नटी आणि अभिनयाची जाण असलेली एक चांगली शालीन नटी गेली असं मी म्हणेन. सीमा देव यांनी अभिनयाच्या या क्षेत्रात एक विशिष्ट स्थान निर्माण केलं होतं, त्यावर काही वादच नाही. त्यांनी अगदी पहिल्या भूमिकेपासून आपलं स्वतःचं नाव या अभिनय क्षेत्रात त्यांनी कोरून ठेवलं होतं. फार छान अभिनेत्री म्हणून मी त्यांचं वर्णन करीन. त्यांची व रमेशजींची जोडी जमली होती. तर त्यांनी कित्येक काळ मराठी चित्रपटसृष्टी गाजवली. सीमा देव या स्वभावाने अतिशय छान व्यक्ती, मी तर त्यांना अगदी मोठ्या बहिणीसारखं मानायचो. एक चांगली अभिनेत्री आपल्यातून निघून गेली, असं निश्चित म्हणेन.(Seema Deo passes away)
हे देखील वाचा – “तीन ते चार वर्ष आजाराशी झुंज आणि…”, आईच्या निधनानंतर अजिंक्य देव भावुक, म्हणाला, “वर्षभरापूर्वी बाबा गेले अन्…”
सीमा देव व ज्येष्ठ अभिनेते रमेश देव या जोडप्याने मराठी चित्रपटसृष्टीला दिलेलं योगदान अमुल्य आहे. त्यांनी मराठीसह हिंदी चित्रपटांमध्येही काम करत स्वतःची एक वेगळी ओळख निर्माण केली. त्यांच्या ‘सुवासिनी’ , ‘जगाच्या पाठीवर’, ‘आनंद’ अशा अनेक चित्रपटांमधील भूमिका विशेष गाजल्या. त्यांनी रुपेरी पडद्यावर साकारलेल्या भूमिकांना प्रेक्षकांनी भरभरुन प्रेम दिलं.
हे देखील वाचा – “तुझ्या मांडीवरती शेवटचा श्वास सोडायचा आहे”, रमेश देव यांची शेवटची इच्छा ऐकून रडल्या होत्या सीमा देव, नेमक काय घडलं होतं?
आज दुर्दैवाने सीमा देव आणि रमेश देव हे दोन्ही कलाकार आज आपल्यात नाहीत. पण वेळोवेळी त्यांची आठवण आल्यावाचून राहत नाही. अभिनयक्षेत्रामुळे ही जोडी केवळ अभिनयानेच नाही तर दोघांनीही आपल्या सदाबहार प्रेमकहाणीने लोकांच्या हृदयात स्थान मिळवलं. रमेश देव व सीमा देव यांच्या लग्नाला ६१ वर्ष पूर्ण झाली आहेत. या जोडप्याची प्रेमकहाणी अनेकांसाठी प्रेरणा देणारी आहे.