मराठमोळी अभिनेत्री अश्विनी महांगडेवर दुःखाचा डोंगर कोसळला आहे. एका जवळच्या व्यक्तीच्या निधनाने अश्विनी व तिच्या कुटुंबियांवर शोककळा पसरली आहे. अश्विनी महांगडे हिने सोशल मीडियावरून पोस्ट शेअर करत तिच्या आजीच्या निधनाची बातमी दिली. अश्विनीच्या जवळच्या व्यक्तीचं म्हणजेच तिचं भरभरून लाड करणाऱ्या आजीचं निधन झाल्याने अभिनेत्री भावुक झाली आहे. इंस्टाग्राम अकाऊंटवरून आजीबरोबरचा फोटो शेअर करत एक भावुक पोस्ट लिहिली आहे. (Ashvini Mahangade Emotional)
‘आई कुठे काय करते’ मालिकेतील अनघा या भूमिकेमुळे अश्विनी महांगडेला लोकप्रियता मिळाली. अश्विनीने तिच्या आजीच्या निधनाची बातमी पोस्ट शेअर करत दिली आहे. अश्विनी म्हणाली, “आजी, फक्त प्रेमाचा साठा पण भारी शिस्तीची. सगळ्यांना एकत्र बांधून ठेवणारी. एक काळ असा होता जेव्हा प्रचंड हाल सोसले पण कल्पतरू सारखी खंबीर उभी राहिली. माझे आणि बाबांचे (पाहुणे म्हणायची ती बाबांना कारण जावयाचे नाव घ्यायचे नसते) किती कौतुक. आम्हा सगळ्यांची चिंता तिला नेहमी असायची. मशाल दौडला आला तर १० वेळा मला फोन केला आणि त्याची काळजी घ्यायला सांगितली.”
यापुढे अश्विनीने लिहिलंय, “‘रयतेच्या स्वराज्य प्रतिष्ठान’च्या पहिल्या वर्धापन दिनानिमित्त सगळ्यांसाठी जेवणाची सोय नानांनी केली ती आजीच्या घरी. आजी, मामा, मामी, विजय, अक्षय सगळेच कामाला लागले. एखादी जबाबदारी पार पाडताना सगळ्यांना अगदी प्रेम द्यायची. तिचं प्रेम, तिची माया, घरात शिरल्या शिरल्या तिने घेतलेली पप्पी सगळंच आता परत अनुभवता येणार नाही.”
अश्विनीने आजीबरोबरचा फोटो शेअर करत तिच्या गोड आठवणी ही शेअर केल्या आहेत. अश्विनीच्या या पोस्टवर अनेकांनी कमेंट करत तिच्या आजीला श्रद्धांजली वाहिली आहे. तसेच अश्विनीचा होणार नवरा नीलेश जगदाळे याने ही तिच्या पोस्टवर कमेंट करत ‘भावपूर्ण श्रद्धांजली’असं म्हटलं आहे. पोस्टमध्ये अभिनेत्रीने म्हटल्याप्रमाणे तिच्या आजीला जावयाचंही विशेष कौतुक होतं.
