‘स्टुडंट ऑफ द ईयर’ या चित्रपटातून अभिनेता वरुण धवन हा अधिक प्रकाशझोतात आला. वरुणने आजवर अनेक चित्रपटांमध्ये महत्त्वपूर्ण भूमिका केल्या. बदलापुर, बवाल, भेडिया, मै तेरा हिरो, कलंक अशा अनेक चित्रपटांमध्ये विविध भूमिका साकारल्या आहेत. पण तो त्याच्या चित्रपटांबरोबरच खासगी आयुष्यामुळेही नेहमी चर्चेत असतो. काही महिन्यांपूर्वी वरुण व त्याची पत्नी नताशा यांनी मुलाला जन्म देणार असल्याचे जाहीर केले होते. अशातच आता ३ जून रोजी वरुणला कन्यारत्न प्राप्त झाले असल्याचे वरुणचे वडील डेव्हिड धवन यांनी सांगितले. त्यानंतर पहिल्यांदाच वरुणने इन्स्टाग्राम अकाऊंटवरुन पोस्ट केली आहे. ( varun dhawan first baby)
वरुण व नताशा यांना मुलगी झाली असल्याचे आजोबा डेव्हिड यांनी माध्यमांना सांगितले. त्यानंतर डेव्हिड व वरुण माध्यमांच्या समोर आले होते. त्यावेळी वरुणच्या चेहऱ्यावरचा आनंद स्पष्टपणे दिसत होता. त्याने आता आपला आनंद चाहत्याबरोबर शेअर केला आहे. मुलीच्या येण्याच्या आनंदात वरुणने पोस्टमध्ये लिहिले की, “आमचे मूल या जगात आले आहे. तुम्ही दिलेल्या शुभेच्छासाठी खूप खूप धन्यवाद. हरे राम हरे राम, राम राम हरे हरे कृष्ण हरे कृष्ण कृष्ण हरे हरे”.
दरम्यान ही पोस्ट व्हायरल होताच त्याच्या चाहत्यांनी व अनेक कलाकारांनी नवीन पाहुणीच्या आगमनासाठी शुभेच्छा दिल्या आहेत. तसेच या क्युट व्हिडीओचं कौतुकदेखील केले जात आहे. दरम्यान ३ जून रोजी वरुणला हिंदुजा रुग्णालयाबाहेर पाहिले गेले. त्यावेली त्यांचा एक व्हिडीओदेखील व्हायरल झाला आहे. या व्हिडीओमध्ये वरुण हा वडिलांबरोबर चालताना दिसत आहे. दोघांच्याही चेहऱ्यावर खूप आनंद दिसत आहे. त्यावेळी तिथे उपस्थित असणाऱ्यांनी वरुणला शुभेच्छा दिल्या. त्यावेळी त्याने माध्यमांना अभिवादन केले.
या वर्षांच्या सुरवातीलाच फेब्रुवारी महिन्यात वरुण व नताशा यांनी आई-वडील होणार असल्याची घोषणा केली होती. नताशाच्या पोटाला किस करतानाचा फोटो चाहत्यांबरोबर शेअर केला होता. हा फोटो शेअर करत त्यांनी लिहिले की, “आम्ही प्रेग्नट आहोत. तुमच्या आशिर्वाद व प्रेमाची गरज आहे”. या पोस्टलाही प्रेक्षकांनी खूप पसंती दर्शवली होती.
