अभिनेत्री मृण्मयी देशपांडे हिने तिच्या अभिनयकौशल्याने प्रेक्षकांच्या मनावर अधिराज्य गाजवलं आहे. सोशल मीडियावरही मृण्मयी बऱ्यापैकी सक्रिय असते. नेहमीच ती काही ना काही शेअर करत ती चाहत्यांच्या संपर्कात राहत असते. विशेषतः मृण्मयीचे तिच्या बहिणीबरोबरचे म्हणजेच गौतमीबरोबरचे अनेक व्हिडीओ चांगलेच व्हायरल होतात. याशिवाय मृण्मयी तिच्या वैयक्तिक आयुष्याबाबतच्याही अनेक गोष्टी शेअर करताना दिसते. मृण्मयी तिचा नवरा स्वप्नील राव बरोबरचेही अनेक व्हिडीओ शेअर करत असते. (Mrunmayee Deshpande Birthday Gift)
अशातच मृण्मयीने तिच्या इन्स्टाग्राम अकाउंटवरुन शेअर केलेल्या एका व्हिडीओने साऱ्यांचं लक्ष वेधलं आहे. आज मृण्मयीचा वाढदिवस आहे. मृण्मयीच्या वाढदिवसानिमित्त तिच्या नवऱ्याने हा व्हिडीओ शेअर करत तिला शुभेच्छा दिल्या आहेत. शिवाय तिला भेटवस्तूही दिली आहे. “वाढदिवसाच्या हार्दिक शुभेच्छा! आमच्या जीवनात संगीत असू दे. तुम्हाला जगातील सर्व आनंद मिळोत. मी तुझ्यावर प्रेम करतो”, असं म्हणत तिला शुभेच्छा दिल्या आहेत.
समोर आलेल्या व्हिडीओमध्ये मृण्मयीला तिच्या सासरच्या मंडळींनी तिला खास सरप्राइज देत भेटवस्तू दिली आहे. या व्हिडीओवरुन असं समोर आलं आहे की, मृण्मयीची इच्छा असलेली सतार तिला भेटवस्तू म्हणून मिळाली आहे. शाळेत असल्यापासून मृण्मयीला सतार वाजवायची आवड होती. थेट मिरज वरून बनवून घेतलेली त्यावर मृण्मयीच नाव लिहून घेतलेली ही खास सतार आहे. ही भेटवस्तू पाहून मृण्मयीला खूप भारावून आलं. ती अतिशय आनंदात असलेली पाहायला मिळाली.
मृण्मयी नेहमीच तिच्या फार्महाऊसमधीलही फोटो, व्हिडीओ पोस्ट करत असते. अभिनेत्री मृण्मयी देशपांडे आणि तिचा नवरा स्वप्निल राव या दोघांनी मिळून महाबळेश्वरमध्ये निसर्गाच्या सान्निध्यात एक छोटसं घर बांधलं आहे. अभिनेत्री सोशल मीडियावर पोस्ट शेअर करत तिच्या या ‘ड्रीम होम’चा फोटोही शेअर करत असते. त्यानंतर दोघांनी त्यांच्या या फार्महाऊसवर शेती करण्यास सुरुवात केली. स्वत:साठी लागणाऱ्या भाज्या-फळभाज्यांचे उत्पादन याठिकाणी ते घेतात.