मालिका आणि त्यात येणारे ट्विस्ट हे जणू एक समीकरणच झाले आहे. कथानकाला अचानक मनोरंजक वळण देण्यासाठी मालिकेच्या निर्मात्यांकडून त्यात काही ट्विस्टची भर केली जाते. झी मराठी वाहिनीवरील ‘नवरी मिळे हिटलरला’ मालिकेतही नुकताच असा एक नवीन ट्विस्ट आला आहे. अभिराम जहागीरदारच्या घरी सध्या मेहंदीचा सोहळा रंगणार आहे. मात्र, अजूनही लीलाला लग्न करायचं नाही. त्यामुळे लीला एजेबरोबर लग्न करण्यासाठी तिच्या परीने प्रयत्न करत आहे. याच ट्विस्टबद्दल उत्सुकता निर्माण करणारा एक प्रोमो चाहत्यांच्या भेटीला आला आहे.
या प्रोमोमध्ये लीलाचे अपहरण झाले असून लीलाला शोधण्यासाठी एजे घराबाहेर पडला आहे. लीला व एजेचं लग्न होऊ नये म्हणून दुर्गा एक कट रचत आहे. दुर्गाच्या या प्लॅनमध्ये लीला स्वतःदेखील सामील झाली आहे. तर, दुसरीकडे विक्रांतने साळुंकेला हाताशी धरून एक नवा प्लॅन सुरू केला आहे. अभिरामने तुरुंगात धाडल्यामुळे चिडलेला साळुंके आता त्याचा बदला घेण्यासाठी हे लग्न मोडण्याचा प्रयत्न करणार आहे. तर, विक्रांतने साळुंकेला तुरुंगातून बाहेर काढून, त्याला मदत करण्याचे आश्वासन दिले आहे. त्यामुळे साळुंके एजे-लीला यांच्या मेहंदी सोहळ्यात वेश बदलून वेटरच काम करत आहे.
दुर्गाने आयत्यावेळी घरातील सगळ्या लाईट घालवून लीलाला पळवण्याचा प्लॅन केला होता. या प्लॅननुसार एक गाडी पार्किंगमध्ये लीलाची वाट पहात थांबली होती. मात्र, दुर्गाचा हा प्लॅन साळुंकेला आधीच कळला आणि त्याने दुर्गाच्या माणसाला बेशुद्ध करून आपल्या माणसाला लीलाला किडनॅप करण्यास सांगितले. दुसरीकडे ही गाडी आणि हा माणूस दुर्गाची असल्याचे समजून, लीलाने देखील स्वतःच गाडीत उडी घेत ड्रायव्हरला गाडी सुरू करण्यास सांगितले. लीला या गाडीत बसली असली तरी, ही गाडी साळुंकेने लीलाला किडनॅप करण्यासाठी पाठवल्याचे तिला कळले नाहीये. त्यामुळे आता लीला पुरती अडकली आहे.
या प्रोमोमध्ये एजे लीलाला शोधायला निघाल्याचे पाहायला मिळत आहे. त्यामुळे आता लीलाचे अपहरण केलेल्या लोकांना एजे शोधून काढणार का? लीलाच्या इच्छेविरुद्ध एजे-लीलाचे लग्न होणार का? हा प्रश्न चाहत्यांना पडला आहे. त्यामुळे आता आगामी भागांत काय पाहायला मिळेल? यासाठी मालिकेचे चाहते उत्सुक आहेत.
