सिनेसृष्टीतील बऱ्याच कलाकार मंडळींनी नवं घर घेतलं असल्याची आनंदाची बातमी चाहत्यांसह शेअर केली. बऱ्याच कलाकारांचं घर घेण्याचं स्वप्न पूर्ण झाल्याचं त्यांनी सोशल मीडियावरुन पोस्ट शेअर करत सांगितलं. याचबरोबर काही महिन्यांपूर्वी अभिनेत्री प्राजक्ता माळीनेही फार्महाऊस खरेदी केल्याची आनंदाची बातमी चाहत्यांसह शेअर केली होती. प्राजक्ता माळीने काही महिन्यांपूर्वी कर्जतमध्ये आलिशान फार्महाऊस खरेदी केलं. (Prajakta Mali Farmhouse)
निसर्गरम्य वातावरणात डोंगराच्या कुशीत सुंदर असं फार्महाऊस असावं अशी प्राजक्ताची इच्छा होती ती पूर्ण झाली. अभिनेत्रीने या फार्महाऊसचं नाव ‘प्राजक्तकुंज’ असं ठेवलं आहे. या प्राजक्ताच्या फार्महाऊसचा एक सुंदर असा व्हिडीओ अभिनेत्रीने तिच्या इन्स्टाग्राम अकाऊंटवरून शेअर केला आहे. यावेळी अभिनेत्रीच्या या भव्य, आलिशान अशा फार्महाऊसची झलक साऱ्यांचं लक्ष वेधून घेत आहे. ‘व्हॅलेंटाईन डे’निमित्त अभिनेत्रीने तिच्या या फार्महाऊसची झलक चाहत्यांसह शेअर केली आहे.
समोर आलेल्या व्हिडिओमध्ये, प्राजक्ता माळीचं फार्महाऊस सुंदर व्ह्यू, मोठ्या खोल्या, ओपन स्विमिंग पूल, आकर्षक फर्निचर अशा सुखसोयींनी परिपूर्ण असलेलं पाहायला मिळत आहे. अभिनेत्रीच्या फार्महाऊसचं नाव ‘प्राजक्तकुंज’ असं असलं तरी, ‘द ग्रीन मोन्टाना’ या नावाने तिने हा सुंदर व्हिला एका नामांकित कंपनीकडे रजिस्टर केला आहे. यामुळे आता कोणतेही पर्यटक रजिस्टर वेबसाईटवर रितसर बुकिंग करून प्राजक्ताच्या बंगल्यात राहू शकतात.
प्राजक्ताच्या या फार्महाऊसमधील किचन, ओव्हन, गॅस, गार्डन या सुखसोयीही असलेल्या पाहायला मिळत आहे. निसर्गाच्या कुशीत असलेले कर्जत येथील प्राजक्ताचं प्राजक्तकुंज हे फार्महाऊस साऱ्यांचं लक्ष वेधून घेत आहे. प्राजक्ता सध्या ‘महाराष्ट्राची हास्यजत्रा’ या कार्यक्रमात सूत्रसंचालकाच्या भूमिकेत आहे. प्राजक्ताच्या वाढदिवशी हास्यजत्रेतील कलाकार मंडळी तिच्या फार्महाऊसवर वाढदिवस साजरा करण्यासाठी पोहोचले होते. यावेळीही त्यांनी अभिनेत्रीच्या फार्महाऊसमधील खास फोटो शेअर केले होते.
