हेमंत ढोमे दिग्दर्शित ‘झिम्मा २’ हा चित्रपट तब्बल पाचव्या आठवड्यातही बॉक्स ऑफिसवर बक्कळ कमाई करताना दिसत आहे. बिग बजेट व हिंदी चित्रपटांच्या गर्दीतही हा चित्रपट आपलं स्थान टिकवून आहे. २४ नोव्हेंबर रोजी हा सिनेमा प्रदर्शित झाला तेव्हापासून या चित्रपटाची सर्वत्र चर्चा सुरु आहे. चित्रपटाच्या कथानकामुळे व कलाकारांमुळे हा चित्रपट एका उंचीवर येऊन पोहोचला आहे. शिवाय प्रेक्षकांचा प्रतिसादही या चित्रपटाला मिळाल्याने हे शक्य झालं आहे. (Kshitee Jog Shared Incident)
‘झिम्मा २’ चित्रपटाचा ट्रेलर समोर आला त्या दिवसापासून चित्रपटातील एका कलाकाराचीचं विशेष चर्चा रंगली ती अभिनेत्री म्हणजे निर्मिती सावंत. तर अभिनेत्री क्षिती जोग हिने चित्रपटात दुहेरी भूमिका साकारली. या चित्रपटात क्षितीने अभिनेत्री व निर्माती अशा दोन्ही बाजू उत्तमरीत्या सांभाळल्या. क्षितीचं मराठी चित्रपटाबरोबरच हिंदी चित्रपटामुळेही कौतुक झालं आहे. या चित्रपटात तगड्या, लोकप्रिय कलाकारांची फौज एकत्र आली. चित्रपटात सुहास जोशी, क्षिती जोग, सुचित्रा बांदेकर, सिद्धार्थ चांदेकर, सायली संजीव, निर्मिती सावंत, रिंकू राजगुरू, शिवानी सुर्वे यांच्या भूमिका लक्षवेधी ठरल्या. निर्मिती सावंत यांच्या भूमिकेने तर अक्षरशः धुमाकूळ घातलेला पाहायला मिळाला.
‘झिम्मा २’च्या अनेक आठवणी, किस्से, यंदाचं वर्ष यावर एकूणच ‘झिम्मा २’च्या कलाकारांनी एका मुलाखतीदरम्यान भाष्य केलं. ‘इट्स मज्जा’च्या ‘राउंड टेबल’ या सेगमेंटमध्ये ‘झिम्मा २’ चित्रपटाचा दिग्दर्शक व कलाकार मंडळींनी हजेरी लावली होती. दिग्दर्शक हेमंत ढोमे, अभिनेता सिद्धार्थ चांदेकर अभिनेत्री निर्मिती सावंत व क्षिती जोग हे कलाकार उपस्थित होते. यावेळी बोलताना क्षिती जोग हिने एक किस्सा सांगितला.
क्षिती म्हणाली, “‘झिम्मा २’च्या वेळी हा चित्रपट प्रदर्शित करण्यासाठी आमच्याकडे टीम होती. पण ‘झिम्मा’च्या वेळी असं काही नव्हतं. तेव्हा आम्ही सर्व पणाला लावून कलाकाराचं मानधन दिलं होतं. त्यावेळी सगळ्यांनी मला फोन करुन घाई कशाला केलीस असं सांगितलं. निर्मिती मावशीने मला फोन करुन, आता कुठे पाठवलेस पैसे, आता तर कोव्हीडमधून बाहेर आलो आहोत. ‘झिम्मा’च्या वेळेला आमच्याकडे अ‍ॅडव्हान्स द्यायला पैसे नव्हते” असं ती म्हणाली.
यापुढे बोलताना क्षिती म्हणाली, “‘झिम्मा २’च्या वेळी ऍडव्हान्सची रक्कम जवळ होती. त्यामुळे मला खूप आनंद झाला होता की, माझ्याजवळ पैसे आहेत. असं म्हणून मी सर्वांना साइनिंग अमाउंट म्हणून चेक दिले. त्यावर सगळे म्हणाले, आता कशाला पैसे दिले. त्याच्यापुढे आठवड्याभराने निर्मिती मावशीने पाहिलं की चेक आहे पण चेकवर सहीचं केली नाही आहे. त्यांनतर जवळपास पंधरा एक दिवसांनी सायलीनेही सारखंच सांगितलं. आज चेक देणारच या आनंदात मी सही करायलाच विसरले”. असे अनेक किस्से त्यांनी या मुलाखतीदरम्यान सांगितले.
