नाटक, मालिका व चित्रपट या तीनही क्षेत्रात सक्रिय असणारे अभिनेते म्हणजे विद्याधर जोशी उर्फ बाप्पा. आजवर त्यांनी त्याच्या खलनायकाच्या भूमिकेतून तसेच एखादवेळेस वडिलांच्या भूमिकेतून प्रेक्षकांच्या मनावर राज्य केले आहे. इतकंच नव्हे तर ‘बिग बॉस’ मराठी मध्ये त्यांनी स्पर्धक म्हणून घेतलेला सहभाग हा एखाद्या तरुण स्पर्धकाला लाजवेल असा होता. विद्याधर जोशी हे सोशल मीडियावरही बऱ्यापैकी सक्रिय असतात. अशातच त्यांनी त्यांच्या फेसबुक पोस्टवरुन वैयक्तिक आयुष्यातील एक अनुभव शेअर केला आहे. (Vidyadhar Joshi Post)
विद्याधर जोशी यांनी फेसबुक पोस्ट शेअर करत म्हटलं की, “गेली दोन-तीन वर्ष तुमच्या बरोबर एक गोष्ट शेअर करायची होती ती आज दत्त जयंतीच्या निमित्ताने करतो. मी राहतो त्याच्या पलिकडे दोन गल्ल्या सोडून एका ठिकाणी दरवर्षी २६ जानेवारी, १ मे, १५ ऑगस्ट, शिवजयंती (वर्षातून दोनदा), दत्त जयंती, हनुमान जयंती, कृष्णजन्म, राम जन्म (हा अलीकडे जोरात) आणि इतरही काही दिवशी सत्यनारायणाची महापूजा होते. लाऊडस्पीकरवरुन मुलायम आवाजात मोठ्यांने पूजा सांगितली जाते. त्याचा मला पूर्वीपासून त्रास व्हायचा. तो मी बोलूनही दाखवायचो पण गेली काही वर्ष तो बोलून दाखवला तर माझे मित्र माझ्याकडे हिंदू धर्मद्रोही व पर्यायाने इतर प्रकारचा द्रोही या नजरेने बघायला लागले आणि आधी ‘याच्यासारख्यांना कापलं पाहिजे’ असं काहीसं म्हणायला लागले” असंही ते म्हणाले.
यापुढे त्यांनी लिहिलं आहे की, “त्यानंतर मी अशी कल्पना काढली की, गेली दोन-तीन वर्ष मी याच दिवशी माझ्या घरी सत्यनारायणाची पूजा करायला लागलो. सार्वजनिक पूजेच्या तिकडचा भट (भटजी, गुरुजी) याच्या पूजा सांगण्यावरुनच मी माझ्या घरी पूजा करायला लागलो. मुलाला ते पूजा सांगणारे कधी येत आहेत याच्यावर नजर ठेवायला सांगितली आणि ते आले की तो मला लगेच फोन करतो. ती पूजा त्यांच्या लाऊडस्पीकरवरुन येणाऱ्या सूचना बहुकूम पूजा करुन घेतो” असंही म्हटलं.
यापुढे ते, “हल्ली माझ्याबद्दलचा आदर समाजात वाढलेला दिसतो. यावर्षी मला चौथीपर्यंतच्या मुलांच्या घेतलेल्या स्पर्धांचा बक्षीस वितरक म्हणून बोलावंल आहे. (वाचलेले दक्षिणेचे पैसे साठवून निदान पूजा सांगणाऱ्यांकरता योग्य प्रकारे आरत्या म्हणण्याचे आणि लाऊडस्पीकर चालवणाऱ्यांकरता साऊंड इंजिनिअरिंगचे वर्ग सुरु करावेत असं मनात आहे त्याची एक शाखा मशिदीतल्या लाऊडस्पीकरवाल्यांकरता ही पुढे मागे चालू करण्याचा विचार आहे. इच्छुकांनी देणगी देण्यास हरकत नाही. फक्त ती रुपये पाच हजार आणि त्याच्या पटीत असावी)” असंही म्हणाले.
