“जिस में है दम तोच फक्त बाजीराव सिंघम” या सुप्रसिद्ध डायलॉगने हिंदीसह मराठी प्रेक्षकांच्या मनावर राज्य केलं आहे. दिग्दर्शक रोहित शेट्टी यांच्या ‘सिंघम’ या लोकप्रिय चित्रपटातील हा डायलॉग आहे. सिंघम या चित्रपटाला खूप लोकप्रियता मिळाली होती. यानंतर या चित्रपटाचा ‘सिंघम रिटर्न्स’ हा दूसरा भागदेखील आला होता. आणि आता या चित्रपटाचा ‘सिंघम अगेन’ हा तिसरा भागदेखील लवकरच प्रेक्षकांच्या भेटीला येणार आहे. अशातच या चित्रपटाच्या शूटिंगदरम्यान अभिनेता अजय देवगणचा अपघात झाल्याचे वृत्त समोर आले आहे. (Ajay Devgan Accident News)
या चित्रपटाचे शूटिंग सुरू असताना सेटवर मोठा अपघात घडला आहे. या अपघातात अभिनेता जखमी झाला आहे. तो जखमी झाल्याचे कळताच आता त्याचे चाहते काळजीत पडले आहेत. या दुर्घटनेत त्याला मोठी इजा झाल्याचे समोर आले आहे ‘सिंघम अगेन’ या चित्रपटाचे शूटिंग सुरू असताना सेटवर घडलेल्या अपघातात अभिनेता जखमी झाला. काही मीडिया रिपोर्ट्सनुसार, मुंबईतील विलेपार्ले येथे या चित्रपटाचे शूटिंग सुरू होते. यावेळी अजय एका अ‍ॅक्शन सीनचे शूटिंग करत होता. या सीनदरम्यानच त्याचा अपघात झाला.
एका कॉम्बॅट सीक्‍वेन्‍सच्‍या शूटिंगच्‍या वेळी चुकून अजयच्‍या चेहऱ्यावर मार लागला. त्यामुळे त्याच्या डोळ्याला इजा झाली आणि त्याला तातडीने रुग्णालयात नेण्यात आले. डॉक्टरांनी त्याच्यावर उपचारदेखील केले. यानंतर काही तासांचा ब्रेक घेतल्यानंतर त्याने पुन्हा लगेच शूटिंगला सुरुवातदेखील केली. दरम्यान त्याची तब्येत आता ठीक असून चाहत्यांनी काळजी करू नये, असे त्याच्या टीमकडून सांगण्यात आल आहे.
दरम्यान, या चित्रपटात प्रेक्षकांसाठी अनेक सरप्राइजेस आहेत. अजय देवगण व करीना कपूर या चित्रपटात मुख्य भूमिकेत आहेत. तर दीपिका पदूकोण, टायगर श्रॉफ, अर्जुन कपूर यांच्यादेखील चित्रपटात महत्त्वाच्या भूमिका आहेत. येत्या १५ ऑगस्ट २०२४ रोजी ‘सिंघम अगेन’ प्रदर्शित होणार असल्याचे म्हटले जात आहे. त्यामुळे या चित्रपटाने प्रदर्शनाच्या आधीच चाहत्यांमध्ये उत्सुकता निर्माण केली आहे.
