छोट्या पडद्यावरील ‘चला हवा येऊ द्या’ या शोमधून नावारुपाला आलेला लोकप्रिय अभिनेता म्हणजे योगेश शिरसाट. ‘चला हवा येऊ द्या’ या कार्यक्रमात त्याने विविध भूमिका साकारत प्रेक्षकांचे मनोरंजन केले. योगेशने ‘चला हवा येऊ द्या’सह ‘कॉमेडीची बुलेट ट्रेन’सारख्या अनेक विनोदी कार्यक्रमांमध्ये विनोदी स्किट्सद्वारे मनोरंजन केले. अभिनयाशिवाय योगेशने लेखन करतही अनेक विनोदी स्किट्स केले आहेत. त्याचबरोबर रुपेरी पडद्यावरही त्याने साकारलेल्या भूमिकांचं कौतुक झालं.
लेखन, अभिनय करत मनोरंजन क्षेत्रात रमणारा हाअ अभिनेता राजकारणातही तितकांच सक्रिय आहे. अशातच योगेशने नुकतीच ‘इट्स मज्जा’च्या ‘मज्जाचा अड्डा’ या मुलाखतीच्या कार्यक्रमात हजेरी लावली. यावेळी त्यांना त्यांच्या “दिसण्यावरुन मनोरंजन सृष्टीत कधी कोणती भूमिका नाकारली गेली आहे का?” असा प्रश्न विचारण्यात आला. यावेळी त्यांनी “दिसण्यामुळे कधी एखादी भूमिका गेली नाही” असं म्हटलं. पण सोशल मीडियावरील कमी फॉलोवर्समुळे काम गेले असल्याचे त्याने सांगितले.
यावेळी त्यांनी असं म्हटलं की, “माझ्या दिसण्यावरुन किंवा शरीरयष्टीवरुन मला कामामध्ये काहीच अडचण आली नाही. उलट मराठी चित्रपटसृष्टीमध्ये दिसण्यापेक्षा गुणवत्तेला अधिक महत्त्व दिलं जातं. मला तसा काही अनुभव आला नाही. पण सोशल मीडियावर फॉलोअर्समुळे कामं जातात हे मी अनुभवलं आहे.” यापुढे योगेशने कमी फॉलोअर्समुळे त्याला एका जाहिरातीतून काढून टाकण्यात आल्याविषयी त्यानी सांगितले.
याबद्दल त्याने असं म्हटलं की, “एका जाहिरातीसाठी माझी निवड झाली. त्या जाहिरातीच्या चित्रीकरणासाठीही मी तयार झालो. विमानाची तिकिटंही माझ्याकडे आली. जयपूरला त्या जाहिरातीचं चित्रीकरण होतं. सगळं ठरलं होतं. मात्र, चित्रीकरणाच्या दोन दिवसांपूर्वीच त्या जाहिरातीच्या टीमने माझे इन्स्टाग्रामवरचे फॉलोअर्स पाहिले आणि माझे फॉलोअर्स पाहिल्यानंतर मला त्यांनी जाहिरातीमधून काढून टाकलं”.
