Prashant Loke Apology Post : मराठी मनोरंजनसृष्टीत सध्या अभिनेता शशांक केतकर आणि दिग्दर्शक-निर्माता मंदार देवस्थळी यांच्यातील वाद चर्चेचा विषय ठरत आहे. ‘हे मन बावरे’ या मालिकेच्या निर्मात्यांवर कलाकारांचे मानधन थकवल्याचे आरोप अनेक वर्षांपासून होत असून, यावर शशांक केतकर यांनी सोशल मीडियावर पोस्ट शेअर करत चॅट्सद्वारे आपली भूमिका मांडली आणि कायदेशीर कारवाईचा इशारा दिला. शशांकच्या या पोस्टनंतर त्याच मालिकेत काम करणाऱ्या अभिनेत्री माधवी जुवेकर यांचे पती आणि लेखक प्रशांत लोके यांनी प्रतिक्रिया देत शशांकने असा “तमाशा करू नये” असं मत व्यक्त केलं होतं आणि मंदार देवस्थळी यांच्या बाजूने पोस्ट केली होती. मात्र, या पोस्टनंतर सोशल मीडियावर प्रतिक्रिया उमटल्यानंतर प्रशांत लोके यांनी पुन्हा एकदा पोस्ट करत शशांक केतकर यांची जाहीर माफी मागितली आहे.
प्रशांत लोके यांची पोस्ट :
“नमस्कार मी प्रशांत लोके, मी लेखक आहे. चार दिवसांपूर्वी माझ्याकडून एक चूक झाली.”शशांक केतकर” या नटाचे त्याच्या मालिकेचा निर्माता मंदार देवस्थळी याच्याकडे पाच लाख बाकी आहेत. माझ्या बायकोचेही साडेतीन लाख बाकी आहेत. शशांकने ती पोस्ट टाकली तेव्हा, मी लिहिलं होतं तमाशा करू नको. तर मी आधी शशांकची माफी मागतो, मला एक म्हणायचं आहे. की शक्यतो सर्व निर्माते कलाकारांचे टेक्निशियनचे पैसे देतात. आणि त्यांनी ते द्यावे. कारण माझ्या माहितीनुसार चॅनल त्यांना सर्व पैसे देतो. मग त्यांनी कलाकारांचे पैसे द्यावेच. नाहीतर निर्मितीच्या क्षेत्रात येऊ नये. मी आताही सांगतो, मंदारने त्या पैशांचं काय केलं माहित नाही. त्याला पुन्हा निर्माता करावा की नाही हा चॅनलचा प्रश्न आहे. (Prashant Loke Apology Post)
पण सगळ्यांचे पैसे हक्काने देणाऱ्या निर्मात्यांवर मी बोलून अन्याय केला. लोक मला म्हणाले, “तुझ्या बायकोला नोकरी आहे. तिला काही फरक पडत नाही”. तर फरक पडतो. पहाटे उशिरापर्यंत शूटिंग करून ती शार्प नऊला ऑफिसमध्ये पोहोचते, कष्टाचे पैसे सगळ्यांना मिळावेत. पैसे न देणाऱ्या निर्मात्याला चॅनलने मालिका देऊ नये. ‘मंदार देवस्थळी’ आधी तुम्ही रेग्यूलर पैसे द्यायचात. नाहीतर आपण पैसे नाही दिले तर कलाकारांचं काही बिघडत नाही असा पायंडा पडेल. हे कुठल्याही कलाकारासाठी आणि टेक्निशियनसाठी चांगलं नाही, हे तुम्ही जाणून असालच, तुम्ही पैसे न दिल्यामुळे लोकांचे खूप प्रॉब्लेम झाले. पण हे योग्य नाही. शशांकशी माझं काही शत्रुत्व नाही. त्याला वाईट वाटलं असेलच, मी त्याची माफी मागतो. कारण माझ्यावर घरच्यांनी केलेले संस्कार आणि पैसे बुडाल्याचं दुःख मला माहित आहे. पण कुठल्याही निर्मात्याने, टेक्निशियनचे पैसे बुडवणं खरंच चुकीचं आहे. पोस्ट करायची मला घाई असते. आणि ती कधीतरी अंगाशी येते. तरी बरं मला माफी मागायची लाज वाटत नाही. चुकलं तर मी माफी मागतोच”. (Prashant Loke Apology Post)
आणखी वाचा – ठाणे-घोडबंदर रोडवर भीषण अपघात; या दुर्घटनेवर मराठी अभिनेत्री संतापली; म्हणाली, “सरकारने हात झटकू नये…”
प्रशांत लोके यांची ही पोस्ट सोशल मीडियावर मोठ्या प्रमाणात चर्चेत आली असून, अनेकांनी कमेंट करत त्यांनी चूक मान्य करून जाहीर माफी मागितल्याबद्दल त्यांचं कौतुक केलं आहे. “मनापासून माफी मागितली, तेच महत्त्वाचं” अशा प्रतिक्रिया अनेक युजर्सनी दिल्या आहेत. दरम्यान, शशांक केतकर यांनी केलेल्या आरोपांनंतर हा वाद नेमका कोणत्या वळणावर जाणार, याकडे संपूर्ण मराठी मनोरंजनविश्वाचं लक्ष लागलं आहे. (Prashant Loke Apology Post)
