Vivek Lagoo Passes Away : ज्येष्ठ अभिनेते विवेक लागू यांचे दि. १९ जून २०२५ रोजी वयाच्या ७४ व्या वर्षी निधन झाले आहे. अद्याप त्यांच्या निधनाचे कारण समोर आलेलं नाही. आज २० जून रोजी मुंबईतील ओशिवरा येथील स्मशानभूमीमध्ये त्यांच्यावर अंत्यसंस्कार होणार आहेत. विवेक यांच्या अचानक जाण्याच्या बातमीने मनोरंजन विश्वावर शोककळा पसरली आहे. विवेक लागू हे दिवंगत अभिनेत्री रीमा लागू यांचे पती होते. विवेक यांनी आजवर मराठी, हिंदी सिनेसृष्टीत शिस्तप्रिय नट म्हणून ओळख मिळवली. मराठी रंगभूमीवरुन त्यांची त्यांचा प्रवास सुरु केला. आज विवेक लागू आपल्यात नाहीत यामुळे अनेक कलाकार मंडळी आणि चाहते हळहळ व्यक्त करत आहेत.
विवेक लागू आणि रीमा लागू यांची मुलगी मृण्मयी लागू ही देखील सिनेविश्वात सक्रिय आहे. मृण्मयी सिनेसृष्टीत अभिनेत्री, सहाय्यक दिग्दर्शक आणि लेखक अशा तिहेरी भूमिका पेलवताना दिसते. हिंदी सिनेविश्वात ती अधिक सक्रिय आहे. आता वडिलांच्या जाण्याने मृण्मयीवर दुःखाचा डोंगर कोसळला आहे. विवेक यांच्या निधनानंतर अभिनेत्रीने सोशल मीडियावर भावुक पोस्ट लिहीत मनं मोकळं केलं आहे.
आणखी वाचा – ज्येष्ठ अभिनेते विवेक लागू काळाच्या पडद्याआड, वयाच्या ७४व्या वर्षी घेतला अखेरचा श्वास
मृण्मयीने इंस्टाग्राम अकाउंटवर बाबांबरोबरचा फोटो शेअर करत असं म्हटलं आहे की, “आम्ही बराच काळ एकत्र लढलो, पण आता फक्त प्रेम आणि कृतज्ञतेने तुमचा निरोप घेण्याची वेळ आली आहे. माझे बाबा! माझा सर्वात चांगला मित्र, माझा मार्गदर्शक, माझा एक नंबरचा चाहता आणि माझ्या मनातला आवाज… मला तुमची आठवण येईल… तुम्ही एका मुलीसाठी सर्वोत्तम बाबा होतात”, असं म्हणत तिने वडिलांना श्रद्धांजली वाहिली आहे.
आणखी वाचा – कॅलिफोर्निया विद्यापिठातून अश्विनी भावेंची लेक झाली पदवीधर, फोटो शेअर करत केलं कौतुक, अभिनंदनाचा वर्षाव
१९७८ साली रीमा लागू आणि विवेक लागू यांनी लग्न केलं. त्यांना मृण्मयी ही एक मुलगी आहे. मुलीच्या जन्मानंतर काही वर्षात त्यांच्या नात्यात दुरावा आला. त्यांनी डिवोर्स घेतला. पण मुलीसाठी ते नेहमीच एकत्र आल्याचं पाहायला मिळालं. पण दोघांनीही कधीच अधिकृतरित्या त्यांच्या डिवोर्सचं कारण समोर येऊ दिलं नाही.
