सिनेसृष्टीत असे बरेच कलाकार आहेत जे त्यांच्या व्यस्त श्येड्युलमधून वेळात वेळ काढत कुटुंबासह, मुलांसह वेळ घालवताना दिसतात. बरेचदा ही कलाकार मंडळी कामामुळे घरापासून दूर असतात. मात्र जेव्हा ते घरी परततात तेव्हा ते त्यांचा क्वालिटी टाइम मुलांसह शेअर करतात. अशातच सुप्रसिद्ध अभिनेता वैभव मांगलेही सध्या कुटुंबियांसह स्पेशल टाइम घालवताना दिसत आहे. तो त्याच्या मुलांसाठी म्हणजेच पौलोमी आणि मुलगा समीहन साठी खास पदार्थ बनवत आहे. (Vaibhav Mangle Video)
नाटक, मालिका, चित्रपट या तीनही क्षेत्रात नाव कमावलेल्या अभिनेत्याच्या यादीत वैभव मांगले हे नाव आवर्जून घेतलं जात. याशिवाय गायन व सूत्रसंचालन यांसारख्या मनोरंजनाच्या क्षेत्रातही वैभव मांगले यांनी आपल्या कला कौशल्याची छाप पाडली. ‘अलबत्या गलबत्या’ व ‘इब्लिस’ या नाटकांतून वैभवने रसिक प्रेक्षकांच्या मनावर राज्य केलं. पण वैभवला खरी ओळख ‘फू बाई फू’ या टेलिव्हिजन शोमधून मिळाली. हा शो वैभवच्या करिअरमधला टर्निंग पॉईंट ठरला.
वैभव सोशल मीडियावरही बर्यापैकी सक्रिय असतो. नेहमीच तो काही ना काही पोस्ट करुन चाहत्यांच्या संपर्कात राहत असतो. याशिवाय वैभव न पटलेल्या मुद्द्यांवर टीका करत आपले मत मांडताना दिसतो. यावरून बरेचदा तो नेटकऱ्यांच्या कचाट्यातही सापडला आहे. मात्र वेळोवेळी त्याने नेटकऱ्यांनाही खडेबोल सुनावले आहेत. आता वैभवने सोशल मीडियावरुन शेअर केलेल्या एका पोस्टने साऱ्यांचं लक्ष वेधून घेतलं आहे. वैभवने त्याच्या मुलांसाठी खास पदार्थ बनवतानाचा एक व्हिडीओ शेअर केला आहे.
आणखी वाचा – मेहंदी सोहळ्यात आमिर खानच्या जावयाने धरला ठेका, मराठी कलाकारांसह केला जबरदस्त डान्स
हा व्हिडीओ शेअर करत “पराठा तितुका मेळावावा” असं कॅप्शन देत त्याने, “आज मी माझ्या मुलांसाठी पराठे कम लच्छा पराठा बनवत आहे. मी युट्युबवर रेसिपी पाहून पराठे बनवायला घेतले आहेत. पनीरचे पराठे मी बनवत आहे. याच पीठ फार वेगळ्या पद्धतीने तयार करण्यात आलं आहे. या पिठात बेकिंग पावडर, मीठ, दूध, दही हे पदार्थ आहेत. सारण बनवण्यासाठी मी पनीर, गाजर, शिमला मिरची, लाल मिरची, हिरवी मिरची, जिरं हे पदार्थ वापरले आहेत. अशाप्रकारे आमचे पराठे बनत आहेत” असं म्हटलं आहे. वैभव मांगले याने पराठे बनवतानाचा व्हिडीओ त्याच्या इन्स्टाग्राम अकाउंटवरुन शेअर केला आहे.