सोशल मीडियावर ट्रेंडिंग रीलकडे सध्या प्रेक्षकवर्ग अधिक ओढला जाताना पाहायला मिळत आहे. एखाद ट्रेंडिंग गाणं असो वा एखादा विषय असो त्यावर अनेकजण रील व्हिडीओ बनवताना दिसतात. अशाच एका ट्रेंडिंग रीलची भुरळ मालिकेतील कलाकारांनाही पडली आहे. ‘झी मराठी’ वाहिनीवरील ‘तुला शिकवीन चांगलाच धडा’ या मालिकेला प्रेक्षकांची विशेष पसंती मिळताना पाहायला मिळत आहे. या मालिकेतील अक्षरा-अधिपतीच्या जोडीला तर प्रेक्षक भरभरुन प्रतिसाद देताना दिसत आहेत. (Akshara – Adhipati On Trending Reel)
अशातच अक्षरा व अधिपती यांनी देखील एका ट्रेंडिंग रीलला फॉलो करण्याचा निर्णय घेतला आहे. ‘आज काय बनवू’, ‘जेवायला काय बनवू’, ‘आज जेवायला काय हवं’, ‘आज कोणते कपडे घालणार’, हा ट्रेंड जोरात सुरु असल्याचं पाहायला मिळत आहे. अनेकजण हा ट्रेंड फॉलो करताना दिसत असून या ट्रेंडला अक्षरा व अधिपती देखील फॉलो करताना दिसत आहेत. दोघांनी त्यांच्या इंस्टाग्राम अकाउंटवरुन या ट्रेंडिंग रीलचा व्हिडीओ शेअर केला आहे.
या ट्रेंडिंग रीलमध्ये असं पाहायला मिळतंय की, अक्षरा अधिपतीला विचारते, “अधिपती आज काय बनवू?”, यावर अधिपती म्हणतो, “एप्रिल फूल सोडून काहीही बनवा”. या व्हिडीओला ‘नको देवराया अंत आता पाहू’ हे बॅकग्राउंड सॉंग लावण्यात आलं आहे. तर या व्हिडिओला “अधिपती आज मार खाणार”, असे कॅप्शन दिले आहे. आज १ एप्रिल रोजी एप्रिल फुलनिमित्त अक्षरा-अधिपतीचा हा व्हिडीओ प्रेक्षकांच्या पसंतीस पडताना दिसत आहे.
‘तुला शिकवीन चांगलाच धडा’ या मालिकेत अक्षरा व अधिपती या जोडीवर प्रेक्षक भरभरुन प्रेम कराताना दिसत आहेत. सध्या अक्षरा पुन्हा एकदा सासरी परतली असून आता ती भुवनेश्वरीला धडा शिकवणार का? याकडे लक्ष लागून राहील आहे. तर भुवनेश्वरी आणि अक्षरा यांच्यातल्या मतभेदामुळे अधिपतीला काय काय सहन करावं लागणार? हे पाहणं रंजक ठरणार आहे.