सिनेसृष्टीत सध्या लगीनघाई सुरु असल्याची पाहायला मिळत आहे. अशातच काही दिवसांपूर्वी अभिनेता सिद्धार्थ चांदेकर त्याच्या आईच्या दुसऱ्या लग्नामुळे चर्चेत आला होता. सिद्धार्थने आईच्या दुसऱ्या लग्नाची बातमी सोशल मीडियावरून देताच साऱ्यांनी त्याच्या या निर्णयाचं कौतुक केलेलं पाहायला मिळालं. सिद्धार्थनंतर आता आणखी एका मराठमोळ्या अभिनेत्रीची आई दुसऱ्यांदा विवाहबंधनात अडकली असल्याचं समोर आलं आहे. आईच्या दुसऱ्या इनिंगची पोस्ट अभिनेत्रीने इंस्टाग्राम अकाऊंटवरून शेअर केली आहे. (Amruta Phadke mom Wedding)
‘ठिपक्यांची रांगोळी’ या मालिकेतून घराघरांत पोहोचलेली अभिनेत्री अमृता फडके हिने नुकतीच तिच्या आईच्या लग्नाची आनंदाची बातमी शेअर केली आहे. अमृताने ‘ठिपक्यांची रांगोळी’ या मालिकेत ‘मानसी वहिनी’ अर्थात मानसी कानिटकर हे पात्र साकारलं होतं. मात्र काही कारणास्तव अभिनेत्रीने मालिकेचा निरोप घेतला. मात्र अमृता कायमच तिच्या सोशल मीडियावरून चाहत्यांच्या संपर्कात राहिली. त्यानंतर आता अमृताच्या एका पोस्टने साऱ्यांचं लक्ष वेधून घेतलं आहे. अमृताने आईच्या नव्या इनिंगचा फोटो शेअर करत ही बातमी चाहत्यांसह शेअर केली.
आईच्या दुसऱ्या लग्नातील फोटो शेअर करत तिने आईसाठी व तिच्या बाबांसाठी खास पोस्ट लिहीत, “आई अभिनंदन. ८.१२.२०२३. तुझ्या नवीन प्रवासासाठी खूप खूप शुभेच्छा. उत्तम लाईफ पार्टनर मिळावा, असावा अशी सगळ्यांचीच मनापासून इच्छा असते. पण तस वाटणं, तसं मिळणं व घडणं हे प्रत्येकाच्या नशिबी असतंच असं नाही. पण आई तुला ही संधी देवाच्या कृपेने पुन्हा मिळत आहे. तेही तुझ्या 2nd inningच्या टप्प्यावर!” असं म्हटलं आहे.
पुढे तिने लिहिलं आहे की, “खूप वर्षांपासून बाबा म्हणून हाक मारायला आणि ती जागा घ्यायला कोणीतरी असावं अशी मनापासून इच्छा होती. माझ्या आयुष्यात हा शब्द आणि मनात ती जागा करणं सोप्प नव्हतं, पण बाबा तू खरंच ती जागा भरून काढू शकतोस ही भावनाही माझ्यासाठी खूप सुखावणारी आहे. तुझ्यामुळे मला प्रेम करायला अजून एक गोड भाऊ आणि एक सुंदर बहीण मिळाली आहे. मनाने खूप श्रीमंत असलेल्या खूप मोठया कुटुंबाचा मी तुझ्यामुळे एक छोटासा भाग झाली आहे. खूप छान वाटतंय. मलाही खूप माणसांनी श्रीमंत झाल्यासारखं वाटतंय. त्यासाठी तुझी आभारी आहे” असं म्हणत आभार व्यक्त केले आहेत.
यापुढे तिने, “आई, या वयात आणि या टप्प्यावर हा निर्णय घ्यायला खूप हिम्मत लागते. त्यासाठी खरंतर दोघांनाही सलाम. तुमची एकमेकांबरोबरची साथ-सोबत, तुमचा प्रेमाचा धागा अजून अजून पक्का होऊन घट्ट विणला जावो हीच स्वामींचरणी प्रार्थना” असंही म्हटलं आहे. अभिनेत्रीच्या या पोस्टवर अनेकांनी अभिनंदनाचा वर्षाव केला आहे.
