ऍक्शन, थरारक, रोमान्सचा भरणा असलेला व कलाकारांची मांदियाळी असलेल्या अंकुश चित्रपटाची सध्या सोशल मीडियावर हवा आहे. चित्रपटातील गाण्यांनी तर सर्वत्र धुमाकूळच घातला आहे. अनेक कलाकारांचा अभिनयाने तयार झालेल्या या चित्रपटाची प्रेक्षकही आतुरतेने वाट पाहत आहेत. चित्रपटातील गाण्यांपाठोपाठ आता चित्रपटाच्या ट्रेलरने सोशल मीडियावर धुमाकूळ घातला आहे. (Ankush Movie Trailer)
बीडचे सुपुत्र असलेले सुप्रसिद्ध व्यावसायिक व चित्रपट निर्माते श्री. राजाभाऊ घुले यांचा आगामी बिगबजेट ऍक्शनचा दमदार तडका असलेला ‘अंकुश’ हा चित्रपट येत्या ६ ऑक्टोबरला संपूर्ण महाराष्ट्रात प्रदर्शित होणार आहे. नुकताच या चित्रपटाचा ट्रेलर सांस्कृतिक मंत्री सुधीरजी मुनगंटीवार आणि राज्याचे माजी मंत्री तसेच परतुर विधानसभा मतदार संघाचे विद्यमान आमदार बबनराव लोणीकर यांच्या हस्ते नुकताच मुंबई येथे लाँच करण्यात आला. राजकीय पार्श्वभूमीच्या कथानकाला प्रेमकथेची जोड असलेल्या ‘अंकुश’ या चित्रपटाचा दमदार ट्रेलर सोशल मीडियावर चांगलाच व्हायरल होत आहे.
अंकुश चित्रपटाच्या ट्रेलरमध्ये असे पाहायला मिळत आहे की, “सामान्य कुटुंबातला तरुण, त्याच्या आयुष्यात आलेली तरुणी, कॉलेज जीवनात उमलणारं प्रेम, काहीतरी करण्यासाठी धडपडणाऱ्या तरुणासमोर आलेला राजकारणाचा डाव असा थरार ट्रेलरमध्ये पाहायला मिळाला. चित्रपटाच्या ट्रेलरमध्येच धडाकेबाज ऍक्शनच दर्शन घडत आहे. त्यामुळेच चित्रपटाविषयीची उत्सुकता वाढली आहे. गायिका अभिनेत्री केतकी माटेगावकरचं लोभस दिसणंही चित्रपटाचं महत्त्वाचं वैशिष्ट्य आहे. पुरेपूर मनोरंजनाचा आनंद देणारा ‘अंकुश’ हा चित्रपट पाहण्यासाठी प्रेक्षकांना केवळ ६ ऑक्टोबरची प्रतीक्षा आहे.”
‘ओमकार फिल्म्स क्रिएशन्स’च्या माध्यमातून राजाभाऊ घुले यांनी ‘अंकुश’ या चित्रपटातुन चित्रपट निर्मितीमध्ये पदार्पण केले आहे. चित्रपटाची कथा नामदेव मुरकुटे यांची असून दिग्दर्शन निशांत नाथाराम धापसे यांचे आहे . मराठीतील दिग्गज संगीतकार अमितराज व चिनार- महेश या सिनेमाचे संगीतकार आहेत. हिंदी मराठी सिनेसृष्टीतील प्रसिद्ध संगीत दिग्दर्शक अमर मोहिले यांनी या चित्रपटाचे पार्श्वसंगीत केले आहे. मंगेश कांगणे, क्षितिज पटवर्धन, समृद्धि पांडे व मंदार चोळकर यांनी गीतलेखन केलं आहे. सुप्रसिद्ध गायक आदर्श शिंदे, हृषिकेश रानडे, अमितराज , हर्षवर्धन वावरे, राहुल सक्सेना, नकाश अजीज आणि केतकी माटेगांवकर यांच्या सुमधुर आवाजात चित्रपटाची गाणी रेकॉर्ड करण्यात आली आहेत. नागराज दिवाकर यांनी छायांकन, तसेच अनेक पुरस्कार प्राप्त संकलक नीलेश गावंड यांनी या चित्रपटाच्या संकलनाची जबाबदारी सांभाळली आहे.
राष्ट्रीय पुरस्कार विजेते आणि केजीएफसारख्या चित्रपटांचे ऍक्शन दिग्दर्शक विक्रम मोर, विख्यात नृत्य दिग्दर्शक गणेश आचार्य यांनी नृत्य दिग्दर्शन, कलादिग्दर्शन गिरीश कोळपकर यांनी केलं असून विशाल चव्हाण कार्यकारी निर्माता आहेत. चित्रपटात केतकी माटेगावकर, स्वप्नदीप घुले, सयाजी शिंदे, भारत गणेशपुरे, चिन्मय उदगीरकर, मंगेश देसाई, ऋतुजा बागवे, शशांक शेंडे, गौरव मोरे, नागेश भोसले, पूजा नायक अशी दमदार स्टारकास्ट आहे.
