Tharal Tar Mag: ‘स्टार प्रवाह’ वाहिनीवरील ‘ठरलं तर मग’ ही मालिका लोकप्रिय मालिकांपैकी एक आहे. त्याप्रमाणेच मालिकेतील कलाकार देखील तितकेच लोकप्रिय झाले. सायली, अर्जुन या भूमिकेला प्रेक्षक नेहमीच भरभरून प्रेम देतात याशिवाय मालिकेतील आणखी एक भूमिकेला प्रेक्षकांचं प्रेम मिळतं. ती भूमिका म्हणजे ‘कुसुम ताई’ ही भूमिका. अभिनेत्री दिशा दानडे ही भूमिका साकारत आहे. नुकतीच सोशल मीडियावर एक पोस्ट शेअर करत तिने सर्वांना आनंदाची बातमी दिली आहे. दिशाला रणबीर कपूरबरोबर जाहिरातीत झळकण्याची संधी मिळाली. इतकी मोठी संधी मिळाल्याने दिशाने सोशल मीडियावर पोस्ट शेअर करत कृतज्ञता व्यक्त केली आहे. तसेच याचा अनुभव देखील तिने कॅप्शनमध्ये सांगितलं आहे.
आणखी वाचा: ‘पारू’ फेम अभिनेत्रीने खरेदी केली नवी कार; ‘तो’ व्हिडीओ शेअर करत म्हणाली,“माझी नवीन कार…”
दिशा ही पोस्ट शेअर करत म्हणाली, “फक्त कृतज्ञता व्यक्त करेन. आज मी खरंच खूप आनंदी आहे कारण, मला एका जाहिरातीत बॉलीवूड अभिनेता रणबीर कपूर यांच्यासह काम करण्याची संधी मिळाली. हा क्षण माझ्यासाठी खूप खास ठरला, कदाचित तो आनंद मी शब्दात व्यक्तही करू शकणार नाही. रणबीरसारख्या प्रतिभावान अभिनेत्याबरोबर स्क्रीन शेअर करणं ही खूप मोठी गोष्ट होती आणि यातून मला बऱ्याच गोष्टी शिकता आल्या. रणबीर केवळ अप्रतिम कलाकारच नाहीतर खऱ्या आयुष्यात अत्यंत नम्र व्यक्ती आहे आणि त्याचं आपल्या कामावर खूप जास्त प्रेम आहे. आणि हे माझ्यासह सर्वांसाठी प्रेरणादायक आहे.” (Tharal Tar Mag)
दिशाने शेअर केलेल्या या पोस्टवर चाहत्यांनी कमेंट्सचा वर्षाव केला आहे. याचबरोबर ‘ठरलं तर मग’ मालिकेतील कलाकार, सोहम बांदेकर, मराठी सिनेसृष्टीतील कलाकार या पोस्टवे आनंद व्यक्त केला आहे. (Tharal Tar Mag)
