jui gadkari emotional post : काही आठवणी या कडू असतात. विशेषतः एकाद्या व्यक्तीचे आपल्या आयुष्यातून अचानक जाणे हे पचवता येणे कठीण. तरीही त्यांच्याबरोबरच्या आठवणीत रमत आपण दिवस काढत असतो. अशातच काही दिवसांपूर्वी ज्येष्ठ अभिनेत्री ज्योती चांदेकर यांच्या निधनाने सिनेसृष्टी हळहळली. त्यांच्या अचानक निधनाच्या बातमीने साऱ्यांनाच खूप मोठा धक्का बसला. वयाच्या ६९ व्या वर्षी त्यांची प्राणज्योत मालवली. सध्या त्या ‘स्टार प्रवाह’ वाहिनीवरील ‘ठरलं तर मग’ या मालिकेत महत्त्वपूर्ण भूमिकेत काम करत होत्या. त्यामुळे मालिकेतील सहकलाकारांबरोबर त्यांचं खास बॉण्ड असल्याचं नेहमीच पाहायला मिळालं. त्यांच्या निधनानंतर मालिकेतील सगळ्याच कलाकारांनी भावुक पोस्ट शेअर केलेली पाहायला मिळाली.
ज्योती चांदेकर यांच्यावर पुण्यात अंत्यसंस्कार करण्यात आले. यावेळी मालिकेतील आणि सिनेसृष्टीतील कलाकारही त्यांना शेवटचे पाहण्यासाठी पुणे येथे पोहोचले. मालिकेतील मुख्य भूमिकेत असणारी सायली म्हणजेच अभिनेत्री जुई गडकरी हीदेखील पूर्णा आजींना शेवटचे पाहण्यास पोहोचली. यावेळी ती ढसाढसा रडताना दिसली. शिवाय सोशल मीडियावरही तिने भावुक पोस्ट शेअर करत ज्योती यांना श्रद्धांजली वाहिली. जुई आणि ज्योती यांचा ऑनस्क्रीन बॉण्ड चांगला नसला तरी ऑफस्क्रीन त्या खूप चांगल्या मैत्रिणी होत्या.
जुईच्या सेटवरील बीटीएस व्हिडीओमध्ये त्या नेहमीच दिसायच्या. आता त्यांना जाऊन चार दिवस झाले असले तरी जुईला ज्योती यांची म्हणजेच पूर्णा आजीची आठवण सतावत आहे. त्यांच्याबरोबरचा एक व्हिडीओ शेअर करत जुईने म्हटलं, “Show must go on किती सहज म्हणतात ना हे वाक्य हल्ली. पण खरंच इतकं सोपं आहे का ते? इतकं सहज मूव ऑन करणं? जेवणाच्या टेबलवर आता रोज दुपारी गोड खाण्यावरुन भांडण होणार नाही. मृत्यू हे जीवनाचे एकमेव सत्य आहे. तरीही आपण ते स्वीकारायला तयार नाही”.
याशिवाय जुईने इंस्टाग्राम स्टोरीमध्ये त्यांच्यबरोबरचा शेवटचा व्हिडीओ पोस्ट केला आहे. हा व्हिडीओ त्यांनी नुकत्याच झालेल्या महासंगम शुटवेळी काढला होता. या व्हिडीओसह कॅप्शन देत तिने म्हटलं की, “आमचा एकत्र शेवटचा व्हिडीओ. खरंच?. महासंगमची रात्र. माझ्याच वयाची मैत्रीण”.
