Tejaswini Pandit emotional : आई-मुलीचं नातं हे नेहमीच खास आहे. आईबरोबरचे नाते नेहमीच स्पेशल असते. आईबरोबर आपण बरेचदा भांडतो, चिडतो मात्र किती काही झालं तरी या नात्यामध्ये दुरावा येणं कठीण. प्रत्येक लेक आपल्या आईसाठी धडपड करत असते. तिचे आरोग्य उत्तम असावं म्हणून ती नेहमीच प्रार्थना करताना दिसते. सिनेसृष्टीत तर अशा अनेक आई-मुलीच्या जोड्या आहेत जे उदाहरण ठरतील. यापैकी एक म्हणजे ज्येष्ठ अभिनेत्री ज्योती चांदेकर आणि त्यांची लेक अभिनेत्री तेजस्विनी पंडित. ज्योती व तेजस्विनी ही मायलेकींची जोडी नेहमीच साऱ्यांची आवडती राहिली.
१६ ऑगस्ट रोजी ज्योती चांदेकर यांचे अकस्मात निधन झाले. आज त्यांना जाऊन चार दिवस झाले असले तरी त्यांचे असे हे अचानक जाणे खरं वाटत नाही आहे. ज्योती यांच्या जाण्याने संपूर्ण सिनेसृष्टीला खूप मोठा धक्का बसला. ज्योती यांच्या निधनाने त्यांची लेक तेजस्विनी पंडित पूर्णतः कोलमडली. आईचे असे अचानक जाणे तिला सहन झाले नाही. अंत्यसंस्कारावेळी तर तिच्या अश्रूंचा बांध फुटला. आईला मुखाग्नी देताना ती धायमोकलून रडताना दिसली.
यानंतर आता तेजस्विनीने आईच्या निधनानंतर एक कविता रिपोस्ट करत भावना व्यक्त केलेल्या पाहायला मिळत आहेत. “काय काय समजून घेऊ, तुम्हीच घ्या समजून मला, एका दिवसासाठी माझी आई मला आणून द्या”, ही कविता तिने पोस्ट केली आहे. यावरुन तेजस्विनी अद्याप आईच्या जाण्यातून सावरलेली नसल्याचं स्पष्ट होत आहे. तेजस्विनीने तिच्या आईच्या निधनाची बातमी सोशल मीडियावर पोस्ट शेअर करत दिली.
तेजस्विनीला अनेकांनी खंबीर राहण्यास सांगितले आणि काळजी घेण्यासही सांगितले. आईच्या निधनाची बातमी शेअर करत तेजस्विनी म्हणाली, “नमस्कार, कळवण्यास अत्यंत दु:ख होत आहे की, मनमुराद जगणारी आणि दिलखुलास हसणारी आमची आई तसंच सर्वांची लाडकी ज्येष्ठ अभिनेत्री श्रीमती ज्योती चांदेकर पंडित यांचं वयाच्या ६९ व्या वर्षी आज १६ ऑगस्ट रोजी अल्पशा आजाराने दु:खद निधन झालं आहे. त्यांचे अंत्यसंस्कार उद्या, १७ ऑगस्ट रोजी सकाळी ११ वाजता, नवी पेठ वैकुंठ स्मशानभूमी, पुणे इथं होणार आहेत”, अशी पोस्ट तिने लिहिली आहे. ज्योती चांदेकर यांच्या निधनाने मराठी सिनेसृष्टीवर शोककळा पसरली आहे.
