Tharala Tar Mag : ‘ठरलं तर मग’ या मालिकेची सध्या जोरदार चर्चा सुरु आहे. अखेर विलास खुनाचा निकाल लागल्याने मालिकेला एक वेगळंच वळण आहे. साक्षी व प्रियाला शिक्षा झाल्याने प्रेक्षकही खुश आहेत. तर अर्जुन ही केस जिंकल्याने त्याचं सगळेच कौतुक करत आहेत. कलाकारांचं कौतुक होणं हिच त्यांच्या कामाची पोचपावती आहे. आणि या शाबासकीसाठी हे कलाकार अहोरात्र मेहनत करताना दिसतात. एखादा स्पेशल सीन, मालिकेतील ट्विस्ट शूट करताना ही मंडळी काळ,वेळ न पाहता मेहनत घेत असतात. बरेचदा अधिक काळ शूट केल्याने नीट असा आराम न केल्याने कलाकारांच्या तब्येती बिघडतात, अशातही ही मंडळी कारणं न देत प्रेक्षकांच्या मनोरंजनास तत्पर असतात.
अशातच ‘ठरलं तर मग’ मालिकेच्या कोर्ट सीन शूटसाठी कलाकारांनी बरीच मेहनत घेतली. बरेच दिवस या एका दिवसाचे शूट करण्यासाठी लागले. याबाबत आता मालिकेतील अर्जुन म्हणजेच अभिनेता अमित भानुशालीने सांगितले आहे. युट्युब व्हिडीओद्वारे अमित म्हणतो, “नमस्कार, आजचा एपिसोड बहुतेक सर्वांनाच खूप आवडलाय, मला बऱ्याच लोकांनी फोन करुन सुद्धा सांगितलं की, कोर्टाचा सीक्वेन्स खूप छान झाला. तुम्ही सर्वांनी अर्जुनला आणि या शोमधील प्रत्येक पात्राला खूप प्रेम दिलं. हे सगळं तुमच्यामुळे शक्य झालं आहे. जेव्हा ३० दिवसांत निकाल लागणार आहे हे आम्हाला समजलं तेव्हा आम्ही सर्वांनीच खूप तयारी करायला सुरुवात केली होती. सर्वांना माहिती होतं की, खूप काम करावं लागणार आहे. त्यात आजारपण आलं पण, आम्ही कोणीच थांबलो नाही. काही झालं तरी ‘शो मस्ट गो ऑन’ या गोष्टीवर माझा कायम विश्वास आहे. याचप्रमाणे मी मेहनत घेऊन काम केलं”.
पुढे अर्जुन म्हणाला, “चॅनेल, निर्माते, लेखक, स्क्रीनप्ले लेखक, दिग्दर्शक, कॅमेरामन, लाइटमन, आमची टीम, प्रमोशनल टीम आजचा एपिसोड चांगला झालं याचं श्रेय संपूर्ण टीमचं आहे. मालिकेचं शूटिंग करताना प्रत्येक दिवशी नवीन परीक्षा असते. मालिकेत काम करणारे कलाकार कुठेही फिट होऊ शकतात हे मी कायम म्हणतो. सगळेजण खूप मनापासून काम करत आहेत. चॅनेलपासून ते निर्मात्यांपर्यंत प्रत्येकाचे मी आभार मानतो”.
शेवटी अर्जुन व्हिडीओमध्ये म्हणाला, “आम्ही सगळे मेकअप रुममध्ये बसून आधी स्क्रिप्ट वाचतो. त्यानंतर मग शूटिंगला सुरुवात होते. कोर्ट सीक्वेन्स जेव्हा असतो, तेव्हा प्रचंड मेहनत घ्यावी लागते. कोर्टाचा जो शेवटचा सीन होता तो एकूण ५० पानांचा होता. त्यात सगळ्यात जास्त माझे संवाद होतो त्यामुळे खूप मेहनत घेतली होती”.
