Tannishtha Chatterjee Breast Cancer : प्रसिद्ध अभिनेत्री आणि दिग्दर्शिका तनिष्ठा चॅटर्जी हिच्या आरोग्याबाबत मोठी अपडेट समोर आली आहे. अभिनेत्री सध्या एका मोठया आजरपणातून जात आहे. गेल्यावर्षीच तिने तिचे वडील गमावले आणि आता ती कर्करोगाचा बळी ठरली आहे. तनिष्ठाला स्टेज ४ स्तनाचा कर्करोग झाला आहे. जेव्हा तनिष्ठाला याबद्दल माहिती मिळाली तेव्हा ती पूर्णपणे खचून गेली. एका मुलाखतीत तिने अलीकडेच कर्करोगाबद्दल सांगितले आहे. तनिष्ठाने सांगितले की, आजारपणानंतर ती आपल्या मुलीबद्दल खूप काळजीत आहे. वडिलांचे कर्करोगाने निधन आणि त्यानंतर अभिनेत्रीला कर्करोगाने झालेला त्रास या सगळ्याच गोष्टी एकामागोमाग झाल्याने तिची मनस्थिती बिघडली.
‘टाईम्स ऑफ इंडिया’शी विशेष संभाषणात तनिष्ठा हिने आपल्या कर्करोगाबद्दल सांगितले. चार महिन्यांपूर्वी तनिष्ठाला कर्करोगाबद्दल माहिती मिळाली. ती म्हणाली, “मी माझ्या वडिलांना कर्करोगाने गमावले. माझ्या आजाराबद्दल मला कळले त्या धक्क्यातून मी सावरत होते. माझ्या आयुष्यात सर्व काही बिघडले आहे. पण मी खचलेली नाही. मी यातून मानवता शिकले आहे. लोक तुमची काळजी घेतात. मी प्रथमच बलवान बनून थकले आहे”.
पुढे ती म्हणाली, “गेल्या वर्षी, कर्करोगामुळे मी माझे वडील गमावले. मला त्याच्या मृत्यूबद्दल शोकही वाटला नाही. कारण माझ्याकडे ७० वर्षांची आई आणि ९ वर्षांची मुलगी सांभाळायला आहे. मला त्यांच्यासाठी मजबूत राहायचे आहे. ज्या दिवशी मला स्टेज 4 स्तनाच्या कर्करोगाबद्दल कळले, मला वाटले की हे माझ्या बाबतीत का घडले. मी अशी कोणती कर्म केली आहेत?, जे अशाप्रकारचे दुःख माझ्या वाट्याला आले आहे”.
तनिष्ठाने पुढे सांगितले की तिने आपल्या मुलीला बहिणीसह अमेरिकेत पाठविले आहे. ती म्हणाली, “तिला माझ्यापासून दूर जायचे नव्हते पण तिचे बालपण वाईट व्हावे अशी माझी इच्छा नव्हती. तिने स्वत: ला एकटे समजू नये अशी माझी इच्छा होती. माझी अशी इच्छा आहे की माझ्याव्यतिरिक्त, तिच्यावर प्रेम करणारे अधिक लोक आहेत याची तिला कायम जाणीव असावी”.
