‘तारक मेहता का उल्टा चष्मा’ या लोकप्रिय मालिकेत सोढीची भूमिका साकारणारा अभिनेता गुरुचरण सिंग दिल्लीतून बेपत्ता झाला असल्याचे वृत्त समोर येत आहे. हा अभिनेता दिल्ली विमानतळावरून बेपत्ता झाला होता. विमानतळावरून तो मुंबईला जात असल्याची माहिती मिळाली, मात्र, तो मुंबईला पोहोचला नाही आणि घरीही परतला नाही.
याबद्दल गुरुचरणच्या वडिलांनी तो बेपत्ता असल्याची तक्रार दाखल केली आहे. ETimes TV ला अभिनेता बेपत्ता असण्यासंदर्भातील तक्रारीची डिजिटल प्रत मिळाली आहे, जी हिंदीत छापण्यात आली आहे. या तक्रारीमध्ये असं लिहिलं आहे की, “माझा मुलगा गुरुचरण सिंग, वय वर्षे : ५० वर्षे, २२ एप्रिल रोजी सकाळी ८.३० वाजता मुंबईला जाण्यासाठी निघाला होता. तो विमान पकडण्यासाठी विमानतळावर पोहोचला होता”.
आणखी वाचा – किरण राव दिग्दर्शित ‘लापता लेडीज’ ओटीटीवर प्रदर्शित होण्यासाठी सज्ज, कधी व कुठे पाहता येणार? जाणून घ्या…
यापुढे यात असं म्हटलं आहे की, “तो विमानतळावर गेला होता. मात्र तो मुंबईला पोहोचला नाही आणि पुन्हा घरीही परतला नाही. त्याचा फोनद्वारेही काही संपर्क होत नाही. तो बेपत्ता झाला आहे. तो मानसिकदृष्ट्या स्थिर आहे आणि आम्ही त्याचा शोध घेत आहोत.”
दरम्यान, त्यांच्या अचानक बेपत्ता झाल्याच्या वृत्ताने मनोरंजन सृष्टीसह त्यांच्या अनेक चाहत्यांमध्ये सध्या खळबळ उडाली आहे. त्याचबरोबर त्यांचे अनेक चाहते सध्या चिंतेत आहेत. त्यांनी तारक मेहता का उलटा चष्मा या मालिकेत रोशन सिंग सोढीची भूमिका साकारली होती. मात्र वडिलांच्या तब्येतीच्या समस्येमुळे त्यांनी ही मालिका सोडली होती. त्या काळात त्याला त्याच्या कुटुंबावर लक्ष केंद्रित करायचे होते.