प्रसिद्ध चित्रपटनिर्माते संजय लीला भन्साळी यांची ‘हिरामंडी’ ही नवी कोरी वेबसिरिज लवकरच प्रेक्षकांच्या भेटीला येणार आहे. येत्या 1 मे रोजी ‘नेटफ्लिक्स’ या ओटीटी प्लॅटफॉर्मवर प्रदर्शित होणार असून नुकताच सिरिजचा प्रीमियर सोहळा पार पडला. या प्रीमियरसाठी बॉलिवूडमधील अनेक कलाकारांनी हजेरी लावली. यामध्ये आलिया भट्ट, अनन्या पांडे, रेखा, सलमान खान अशा अनेक कलाकारांनी हजेरी लावली होती. यावेळी ऋचा चढ्ढा व रेखाचा एक गोड व्हिडीओ सोशल मीडियावर व्हायरल झाला आहे. (rekha kissed on richa chaddha baby bump)
‘हिरामंडी’च्या निमित्ताने सर्व कलाकार एकत्रित जमा झाले होते. तेव्हा त्यावेळी उपस्थित असणाऱ्या रेखा या ऋचाबरोबर गप्पा मारत होत्या. ऋचा व अली फजल यांनी या वर्षी आई-वडील होणार असल्याचे सांगितले होते. त्यामुळे या कार्यक्रमाच्या वेळी ऋचा गरोदर असल्याचेही पाहायला मिळाले. तिचे पोट दिसत असून ती खूप सुंदर दिसत होती. यावेळी रेखा व ऋचा यांच्यामध्ये गप्पा सुरु होत्या आणि तेव्हाच रेखा यांनी ऋचाच्या पोटाला किस केल्याचे दिसून आले.
सोशल मीडियावर हा व्हिडीओ मोठ्या प्रमाणात व्हायरल झाला आहे. या व्हिडीओवर अनेक नेटकऱ्यांनी प्रतिक्रिया दिल्या आहेत. त्यामध्ये एका नेटकाऱ्याने लिहिले की, “रेखा या चांगल्या मनाच्या आहेत”, दुसऱ्या नेटकऱ्याने लिहिले की, “रेखाची ओव्हरअक्टिंग कधीही संपणार नाही”. दरम्यान या व्हिडीओला खूप पसंती मिळाली आहे.
‘हिरामंडी’ या सिरिजमध्ये मनीषा कोइराला, सोनाक्षी सिन्हा, संजीदा शेख, आदिती राव हैदरी, ऋचा चढ्ढा, शर्मिन सहगल, शेखर सुमन व फरदीन खान हे कलाकार मुख्य भूमिकांमध्ये काम करताना दिसणार आहेत. नुकताच ऋचा या सिरीजमधील तिच्या भूमिकेबद्दल सांगितले होते. ती म्हणाली की, “या सिरिजमधील माझी भूमिका ही देवदासासारखी आहे. ती ज्या मुलाबरोबर असते ती काही ना काही गोंधळ घालते. पण भूतकाळात ती खोटं बोलली होती. तसेच माझी भूमिका ही दु:खद असले तरीही ही भूमिका तितकीच चांगली आहे”. सध्या ऋचा गरोदर असून येत्या काही महिन्यातच ती बाळाला जन्म देऊ शकते.
