‘तुझ्याविना वैकुंठाचा कारभार चालंना’…. स्त्रियांशिवाय या पूर्ण विश्वाची कल्पना करणे हे किती अवघड व क्लिष्ट आहे, हे या ओळीतून आपल्या लक्षात येईल. आपल्या प्रत्येकाच्या आयुष्यात ‘ती’चं एक अनन्यसाधारण महत्व आहे. किंबहुना ‘ती’च्यामुळेच आपल्या जीवनाला अर्थ आहे असं म्हटलं तर अतिशयोक्ती होणार नाही.
उद्या ८ मार्च, जागतिक महिला दिन. राजकारण, समाजकारण, व्यवसाय, उद्योग, शिक्षण, तंत्रज्ञान यांसह मनोरंजन क्षेत्रातही स्त्रियांनी आपली बाजी मारली आहे. आज प्रत्येक क्षेत्रात स्त्रिया पुरुषांच्या खांद्याला खांदा लावून नव्हे, तर पुरुषांच्या वरचढ जाऊन आपली मुशाफिरी करत आहे. मात्र बाई म्हटली की, ‘संघर्ष’ हा तिच्या पाचवीलाच पूजलेला. त्यात मनोरंजन क्षेत्रातील संघर्ष हा आगळाच. कुणाच्याही पाठिंब्याशिवाय मनोरंजनाच्या या चंदेरी दुनियेत आपल्या संघर्षाने स्वत:ला सोनेरी झळाळी बहाल करणाऱ्या अनेक अभिनेत्री आहेत. त्यापैकीच एक लोकप्रिय नाव म्हणजे अभिनेत्री सुप्रिया पाठारे, चला तर आजच्या महिला दिनानिमित्त जाणून घेऊ, सुप्रसिद्ध अभिनेत्रीच्या संघर्षाबद्दल…
आणखी वाचा – बायकोला पुरस्कार मिळताच प्रसाद जवादेचा आनंद गगनात मावेना, व्हिडीओही केला शेअर, म्हणाला, “बायको…”
मराठी मालिकांचा लोकप्रिय चेहरा म्हणून प्रसिद्ध असलेली अभिनेत्री म्हणजे सुप्रिया पाठारे. सुप्रिया यांना अगदी लहानपणापासून घरातील जबाबदारी सांभाळावी लागली. त्यासाठी त्यांनी अनेक घरांची धुणी-भांडीही केली. याचबाबत त्यांनी एका मुलाखतीत त्यांच्या संघर्षाविषयी भाष्य केलं होतं. यावेळी त्यांनी असं म्हटलं होतं की, “मला एसीपी, इन्स्पेक्टर अशा काहीतरी क्षेत्रात करिअर करायचं होतं. पण तेव्हा घरची परिस्थिती फार काही चांगली नव्हती. मी घरात सगळ्यात मोठी. आईने कधी शिक्षण घेण्यासाठी नकार दिला नाही. पण परिस्थितीबरोबर काम करणं खूप गरजेचं होतं. त्यामुळे मी खूप गोष्टी केल्या आहेत. लोकांच्या घरी भांडी घासली, कपडे धुतले आहेत. रस्त्यावर अंडी व चणे घेऊन विकायला बसायचे”.
अभिनेत्रीने धुणीभांडी करत मनोरंजन सृष्टीत आपली एक वेगळी ओळख निर्माण केली आहे. त्यामुळे तिचा संघर्ष नक्की सर्वांसाठी प्रेरणादायी आहे. दरम्यान, आपल्या वैविध्यपूर्ण भूमिकांमधून सुप्रिया यांनी त्यांचं उत्कृष्ट अभिनयकौशल्य सिद्ध केलं आहे. आजवर साकारलेल्या विनोदी, गंभीर तसेच नकारात्मक अशा प्रत्येक भूमिकेद्वारे सुप्रिया पाठारे यांनी प्रेक्षकांचं मनोरंजन केलं आहे.