टी-२० विश्वचषकाचे विजेतेपद पटकावत भारतीय संघ ट्रॉफीसह भारतात परतला आहे. तब्बल १७ वर्षांच्या प्रतिक्षेनंतर भारताने टी-२० विश्वचषकावर आपले नाव कोरले आहे. रोहित शर्माच्या नेतृत्त्वाखाली परफेक्ट संघाने ही मोहिम फत्ते करुन दाखवली आहे. भारतीय संघाने अष्टपैलू कामगिरी करत दक्षिण आफ्रिकेवर हा विजय मिळवला आहे. भारताने दुसऱ्यांदा टी-२० विश्वचषकाला गवसणी घालण्यात प्रशिक्षक राहुल द्रविड यांचा सिंहाचा वाटा आहे. राहुल द्रविड यांनी आजवर त्यांच्या प्रवासात अनेक चढ-उतार पाहिले. मात्र ही लढाई अगदी उत्तमरीत्या पेलवली. (aditi dravid on rahul dravid)
राहुल यांचा हा प्रवास विजेतेपद जिंकल्यानंतरच्या व्हिडीओमध्ये दिसला. भर मैदानात त्यांचे डोळे भरुन आलेले दिसले. हा व्हिडीओ सध्या तुफान व्हायरल होत आहे. यानंतर या आनंदाच्या जंगी सेलिब्रेशनची एक पोस्ट मराठमोळ्या अभिनेत्रीने शेअर केली आहे. कारण या मराठमोळ्या अभिनेत्रीचं राहुल द्रविड यांच्याशी खास कनेक्शन आहे. ही खास पोस्ट राहुल द्रविड यांची पुतणी व मराठमोळी अभिनेत्री अदिती द्रविड हिने शेअर केली आहे. टी २० विश्वचषकाची ट्रॉफी रोहित शर्माच्या हातात आली तेव्हा साऱ्यांना अत्यानंद झाला.
त्यानंतर ही ट्रॉफी विराट कोहलीच्या हातात आली तेव्हा विराटने मागे उभे असलेल्या राहुल यांना पुढे बोलावत त्यांच्या हातात ही ट्रॉफी सोपवली. यावेळी शांत, संयमी असणाऱ्या राहुल यांचं खूप कौतुक झालं. हा व्हिडीओ सध्या व्हायरल झाला असून हा व्हिडीओ राहुल द्रविड यांची पुतणी अदिती द्रविड हिनेदेखील तिच्या इन्स्टाग्राम अकाउंटवरुन शेअर करत कौतुक केलं आहे. ही पोस्ट शेअर करत “या माणसासाठी आणि सर्वोत्तम ११ खेळाडूंसाठी इंडिया इंडिया”, असं म्हटलं आहे.
तर दुसऱ्या पोस्टमध्ये राहुल द्रविड यांच्याबरोबरचा फोटो शेअर करत, “धन्यवाद कोच. तुम्ही त्यांना चांगले प्रशिक्षण दिले, परिपूर्ण शेवट. असेच फेअरवेल त्यांना मिळणे आवश्यक होते. तुमच्यासारखा कोणी नाही. The Wall. माझ्या आयुष्यातील २ सर्वोत्तम माणसांसाठी मी आभारी आहे. अभिमान, आदर आणि प्रेम!”, असं म्हटलं आहे.
