सध्या सर्वत्र दिवाळीचा माहोल सुरू आहे. सामान्य जनतेबरोबरच कलाकार मंडळींमध्ये देखील दिवाळीचा उत्साह पहायला मिळत आहे. अनेक कलाकार मंडळी आपल्या सोशल मिडियाच्या माध्यमातून त्यांच्या चाहत्यांबरोबर दिवाळीचा आनंद साजरा करताना दिसत आहेत. अशातच ‘ठिपक्यांची रांगोळी’ फेम सारिका नवाथे या अभिनेत्रीने तिच्या सोशल मीडियावर दिवाळीनिमित्त एक खास व्हिडीओ शेअर केला आहे. या व्हिडीओत सारिका कणकेचे दिवे करताना दिसत आहे. (Sarika Nawathe Shared Diwali Special Video)
सारिकाने कणकेचे दिवे करतानाचा हा व्हिडीओ शेअर करत त्याखाली लिहिले आहे की, “रील्स पाहत असताना हे क्यूट गुलाबा सारखे कणकेचे दिवे कसे करायचे ते पाहिले आणि छान वाटलं. हा व्हिडीओ पाहून असं वाटलं की आपण पण हे करून बघू.” यानंतर ती असं म्हणाली की, “कणकेचा दिवा हा इतर दिव्यांच्या तुलनेत अत्यंत पवित्र आणि शुद्ध मानला जातो. अंधकारावर प्रकाशाचा विजय म्हणून हा सण साजरा केला जातो. अंधार हा कितीही गडद असला तरी प्रकाशाची एक किरण त्याला भेदू शकते. अंधाराचा नाश करू शकते.” सारिकाने हा व्हिडीओ शेअर करत तिच्या चाहत्यांना “तुम्ही या दिवाळीनिमित्त काय स्पेशल करताय?” असंही म्हटलं आहे. त्याचबरोबर “तुम्ही जे काही नवीन शिकलात वा तुम्ही काही वेगळं करत असाल तर ते नक्की शेअर करा.” असं म्हणत तिने तिच्याबरोबर चाहत्यांना देखील यात सहभागी करून घेतले आहे.
‘ठिपक्यांची रांगोळी’ या मालिकेत बेबी आत्या ही भूमिका ही कमी कलावधीसाठी होती. मात्र कमी कालावधीतच या भूमिकेला प्रेक्षकांनी चांगला प्रतिसाद दिला होता. दरम्यान ‘ठिपक्यांची रांगोळी’ ही मालिका लवकरच प्रेक्षकांचा निरोप घेणार आहे. त्यामुळे सध्या या मालिकेची सर्वत्र जोरदार चर्चा सुरू आहे. काही दिवसांपूर्वीच मालिकेच्या शेवटच्या दिवसाचं शूटिंग पार पडलं.
सारिकाने शेअर केलेल्या या व्हिडिओखाली तिच्या अनेक चाहत्यांनी तिला प्रतिक्रिया दिल्या आहेत. अभिनेते अविनाश नारकर यांनीदेखील या व्हिडीओखाली ‘व्वा व्वा व्वा व्वा व्वा… सारिका…. क्या बात है…!’ असं म्हणत प्रतिक्रिया दिली आहे. तर अविनाश यांच्या या प्रतिक्रियेवर सारिकानेदेखील मजेशीर अंदाजात ‘हो आपण सतत दिवे लावत राहायचे. असं म्हणत त्यांना दीपावलीच्या शुभेच्छा देत, “शुभ दीपावली”, असं म्हटलं आहे.
