कन्नड चित्रपटसृष्टीमधील सुप्रसिद्ध अभिनेता विजय राघवेंद्रची पत्नी स्पंदनाचं निधन झालं आहे. विजयच्या पत्नीच्या निधनानंतर संपूर्ण कुटुंबालाच मोठा दुःखद धक्का बसला आहे. हृदयविकाराच्या झटक्यामुळे स्पंदनाचं निधन झालं असल्याचं बोललं जात आहे. विजयच्या पत्नीच्या निधनानंतर दाक्षिणात्य चित्रपटसृष्टीमधील अनेक कलाकारांनी तिला श्रद्धांजली वाहिली आहे. कुटुंबासह परदेशात फिरायला गेली असता हा संपूर्ण प्रकार घडला असल्याची माहिती समोर आली आहे.
‘इंडिया टुडे’च्या वृत्तानुसार स्पंदना कुटुंबियांसह व्हॅकेशनसाठी बँकॉकला गेली होती. दरम्यान बँकॉकला खरेदी करत असताना तिला अस्वस्थ वाटू लागलं. शॉपिंग रुममधून घरी परतत असताना तिला हृदयविकाराच झटका आला. दरम्यान स्पंदनाला रुग्णालामध्ये घेऊन जाण्यात आलं. मात्र रुग्णालयामध्ये नेल्यानंतर तिला मृत घोषित करण्यात आलं.
परदेशात निधन झाल्यानंतर स्पंदनाचं पार्थिव भारतात आणण्यासाठी विलंब होत आहे. मंगळवारी (८ ऑगस्ट) स्पंदनातं पार्थिव बंगळुर येथे आणण्यात येईल. व्हॅकेशनसाठी गेली असता स्पंदनाचं अचानक निघून जाणं कुटुंबियांसाठी धक्कादायक आहे. स्पंदनाने काही चित्रपटांमध्येही काम केलं आहे.
‘अपूर्वा’ या चित्रपटामध्ये स्पंदनाने पाहुणा कलाकाराची भूमिका साकारली होती. याच महिन्यामध्ये राघवेंद्र व स्पंदना लग्नाचा १६वा वाढदिवस साजरा करणार होते. २००७मध्ये राघवेंद्र व स्पंदना विवाहबंधनात अडकले. या दोघांना एक मुलगाही आहे. शौर्य असं या मुलाचं नाव आहे. पत्नीच्या निधनानंतर राघवेंद्रही पूर्ण खचून गेला आहे.
