Pooja & Soham International Trip : मराठी सिनेसृष्टीत सध्या ज्या लग्नसोहळ्याची सर्वाधिक चर्चा रंगली ती म्हणजे अभिनेता सोहम बांदेकर आणि अभिनेत्री पूजा बिरारी यांचा ग्रँड विवाहसोहळा. २ डिसेंबर २०२५ रोजी लोणावळ्याच्या सुंदर वातावरणात सोहम आणि पूजाचा लग्नसोहळा मोठ्या थाटामाटात पार पडला. कुटुंबीय, जवळचे मित्र आणि निवडक पाहुण्यांच्या उपस्थितीत हा विवाह सोहळा पारंपरिक पद्धतीने पार पडला होता. लग्नानंतर मुंबईत आयोजित करण्यात आलेल्या ग्रँड रिसेप्शनने मात्र सर्वांचं लक्ष वेधून घेतलं.
या रिसेप्शन सोहळ्यात मराठी सिनेसृष्टीतील अनेक नामवंत कलाकारांसह राजकीय क्षेत्रातील दिग्गज नेत्यांची उपस्थिती पाहायला मिळाली. त्यामुळे सोहम-पूजाच्या लग्नाची चर्चा केवळ मनोरंजन विश्वापुरती मर्यादित न राहता सर्वत्र रंगली. सोशल मीडियावर लग्नातील फोटो, व्हिडीओ आणि रिसेप्शनचे क्षण मोठ्या प्रमाणात व्हायरल झाले होते. लग्नानंतर लगेचच अभिनेत्री पूजा बिरारीने तिच्या ‘येडं लागलं प्रेमाचं’ या लोकप्रिय मालिकेच्या सेटवर पुनरागमन केलं. लग्नानंतरही कामाविषयीची तिची कमिटमेंट पाहून चाहत्यांनी तिचं कौतुक केलं.
दरम्यान, नववर्षाचं स्वागत खास पद्धतीने करण्यासाठी सोहम आणि पूजा परदेशात पोहोचले आहेत. दोघांनीही त्यांच्या सोशल मीडिया अकाउंटवरून काही खास फोटो शेअर केले असून सध्या ते सिंगापूरमध्ये सुट्टीचा आनंद घेत असल्याचं समोर आलं आहे. या फोटोंना कॅप्शन देताना सोहम आणि पूजाने “Postcard from Singapore” असं लिहिलं असून परदेशातील सहलीचा उत्साह व्यक्त केला आहे. त्यांच्या या पोस्टवर चाहत्यांनी शुभेच्छांचा आणि प्रेमाचा वर्षाव केला आहे. विशेष म्हणजे येत्या २ जानेवारीला सोहम आणि पूजाच्या लग्नाला एक महिना पूर्ण होणार आहे. लग्नानंतर परदेशात नववर्ष साजरं करत असलेलं हे कपल सध्या चाहत्यांमध्ये चांगलंच चर्चेत आले आहेत.
