Vijaya Babar Dance Video : ‘झी मराठी’ वाहिनीवरील लोकप्रिय ‘कमळी’ मालिका प्रेक्षकांच्या मनावर अधिराज्य गाजवण्यात यशस्वी ठरली आहे. साधी कथा, ग्रामीण पार्श्वभूमी आणि प्रभावी अभिनयामुळे ही मालिका प्रेक्षकांची विशेष आवडती ठरत आहे. विशेषतः मालिकेतील कमळीची भूमिका साकारणाऱ्या अभिनेत्री विजया बाबर हिला प्रेक्षकांकडून प्रचंड प्रेम मिळताना दिसत आहे. तिच्या सहजसुंदर अभिनयामुळे कमळी हे पात्र घराघरात पोहोचलं आहे. सध्या ‘कमळी’ ही मालिका टीआरपीच्या शर्यतीत तिसऱ्या स्थानावर असून मालिकेतील ट्विस्ट आणि टर्न्स प्रेक्षकांना खिळवून ठेवत आहेत.
दरम्यान, मालिकेतील साधी, गावाकडची कमळी प्रत्यक्ष आयुष्यात मात्र अगदी वेगळ्या स्वभावाची आहे, हे नुकतंच समोर आलं आहे. अभिनेत्री विजया बाबरचा एक व्हिडीओ सध्या सोशल मीडियावर प्रचंड व्हायरल होत आहे. या व्हिडीओमुळे तिच्या खऱ्या व्यक्तिमत्त्वाची झलक चाहत्यांना पाहायला मिळाली आहे. विजया ही खऱ्या आयुष्यात अत्यंत मनमोकळी, उत्साही आणि मॉडर्न असल्याचं या व्हिडीओमधून स्पष्ट होत आहे.
हा व्हायरल व्हिडीओ सुप्रसिद्ध गायिका सुनिधी चव्हाण हिच्या एका लाईव्ह कॉन्सर्टमधील आहे. या कॉन्सर्टदरम्यान विजया प्रेक्षकांमध्ये उपस्थित होती. याच वेळी बॉलिवूड चित्रपट ‘धूम ३’ मधील लोकप्रिय गाणं ‘कमली कमली’ वाजताच विजयाने सुंदर डान्स केलं. मालिकेच्या नावाशी जुळणाऱ्या या गाण्यावर ती मनमुराद नाचताना दिसत आहे. तिचा उत्स्फूर्त डान्स, हसरा चेहरा आणि आत्मविश्वास चाहत्यांचं लक्ष वेधून घेत आहे.
आणखी वाचा – रश्मिका मंदाना आणि विजय देवरकोंडा लवकरच विवाहबंधनात अडकणार; ‘या’ दिवशी आणि ‘या’ ठिकाणी होणार लग्नसोहळा
या व्हिडीओवर चाहत्यांनी भरभरुन प्रतिक्रिया दिल्या आहेत. “हे तर तुझंच गाणं आहे”, “ही आमची कमळी आहे”, “कमळी रॉक” अशा अनेक मजेशीर आणि कौतुकास्पद कमेंट्स करत चाहत्यांनी विजयावर प्रेमाचा वर्षाव केला आहे. छोट्या पडद्यावर गंभीर आणि साधी भूमिका साकारणारी कमळी प्रत्यक्ष आयुष्यात इतकी एनर्जेटिक आणि ग्लॅमरस आहे, हे पाहून चाहते चकित झाले आहे. एकीकडे मालिकेतून विजया बाबर आपल्या अभिनयाने प्रेक्षकांची मनं जिंकत आहे, तर दुसरीकडे सोशल मीडियावर तिची लोकप्रियता झपाट्याने वाढताना दिसत आहे. तिचा हा व्हायरल डान्स व्हिडीओ सध्या चाहत्यांमध्ये चांगलाच चर्चेचा विषय ठरत आहे.
