‘आमचं ठरलं’ म्हणत गायिका मुग्धा वैशंपायन व गायक प्रथमेश लघाटे यांनी त्यांच्या प्रेमाची जाहीर कबुली दिली. थेट एकत्र एक फोटो शेअर करत त्यांनी त्यांच्या प्रेमाची जाहीर कबुली दिली. त्यानंतर दोघांच्या लग्नाची जोरदार चर्चाही रंगलेली पाहायला मिळाली. ‘सारेगमप लिटिल चॅम्प्स’ कार्यक्रमातून मुग्धा व प्रथमेश घराघरांत पोहोचले. मुग्धा व प्रथमेश यांनी गेल्यावर्षी २१ डिसेंबरला त्यांचा शाही लग्नसोहळा उरकला. दोघांचं मोठ्या थाटामाटात आणि पारंपरिक अंदाजात लग्न केलं. (Mugdha Vaishampayan Mangalsutra)
मुग्धा व प्रथमेश त्यांच्या लग्नानंतर बरेच चर्चेत आलेले पाहायला मिळाले. दोघांच्या लग्नातील बरेच फोटो, व्हिडीओ व्हायरलही झाले होते. सोशल मीडियावर ही जोडी नेहमीच सक्रिय असते. रोजचे अनेक अनुभव ते चाहत्यांबरोबर शेअर करत असतात. अनेकदा काही पोस्टमुळे दोघांना ट्रोलही केलं आहे. पण दोघांनीही अशावेळी सडेतोड उत्तर देऊन ट्रोलर्सचं तोंडही बंद केलं आहे. नुकतीच मुग्धाने एक पोस्ट शेअर केली आहे.
मुग्धाने तिच्या इंस्टाग्राम अकाउंटवरुन शेअर केलेल्या एका पोस्टने साऱ्यांचं लक्ष वेधून घेतलं आहे. मुग्धा व प्रथमेश यांच्या लग्नाला ३ महिने पूर्ण झाले आहेत. लग्नाला ३ महिने पूर्ण होताच दोघांनी शेअर केलेल्या एका पोस्टने साऱ्यांचं लक्ष वेधून घेतलं आहे. लग्नाला ३ महिने पूर्ण होताच दोघांनी गोव्यातील मंदिरात जात दर्शन घेतले आहे. दर्शनाचे हे फोटो शेअर करत, “कालच आमच्या लग्नाला ३ महिने पूर्ण झाले. याच निमित्ताने आज गोव्यातल्या केरीला जाऊन विजयादुर्गा देवीचं आणि माणगावातील श्री दत्त मंदिरात जाऊन दत्त महाराजांचं, श्रीमद् परमहंस परिव्राजकाचार्य वासुदेवानंद सरस्वती टेंबे स्वामी महाराजांचं दर्शन घेतलं. हेची घडो मज जन्मजन्मांतरी, मागणे श्रीहरी नाही दुजे|”, त्यांनी असं म्हटलं आहे.
या फोटोमध्ये मुग्धा निळ्या रंगाच्या साडीत, तर प्रथमेश फिकट हिरव्या रंगाच्या शॉर्ट कुर्ता अशा पारंपरिक अंदाजात दिसत आहे. यावेळी मुग्धाच्या गळ्यातील पारंपरिक मंगळसूत्राने लक्ष वेधून घेतलं आहे. दरम्यान एका नेटकऱ्याने मुग्धाच्या मंगळसूत्रावरून केलेली कमेंट लक्ष वेधून घेत आहे. “मंगळसूत्र उलट आहे की काय अजून?”, असं म्हटलं आहे. या कमेंट दुसऱ्या एका चाहतीने कमेंट करत, “आमच्यात लग्नाला १ वर्ष किंवा पहिला गुढीपाडवा यापैकी जे आधी येईल त्या वेळेला मंगळसूत्र सरळ करतात” असं म्हणत शंकेचं निरसन केलं आहे. तर यावर काहींनी “त्यांच्या लग्नानंतर मोठा सण झाला नाही, आता पाडव्याला करतील बहुतेक सरळ मंगळसूत्र”, “गुढीपाडव्याला सरळ करतात”, “आमच्या इकडे कोकणात पाडव्याला मंगळसूत्र सरळ करतात. आता करतील”, असं म्हटलं आहे.
