इतिहासाच्या पानावर, रयतेच्या मनावर आणि मातीच्या प्रत्येक कणावर कायमचे कोरले गेलेले नाव म्हणजे छत्रपती शिवाजी महाराज. ३५० वर्षांनंतर आजही महाराष्ट्राच्या प्रत्येक डोंगर-दऱ्या, कड्या-कपारीमधून हिंडणारा मोकळा वारा अन् गडकोटांवरची माती छत्रपती शिवाजी महाराज व त्यांच्या निष्ठावान मावळ्यांच्या पराक्रमाची साक्ष देतात. छत्रपती शिवाजी महाराजांच्या याच पराक्रमाचे व शौर्याचे स्मरण म्हणून दरवर्षी मोठ्या आनंदात व जल्लोषात शिवजयंती साजरी केली जाते.
सालाबादप्रमाणे येत्या १९ फेब्रुवारीलाही छत्रपती शिवाजी महाराजांची जयंती मोठ्या उत्साहाने साजरी केली जाणार आहे आणि याच शिवजयंतीचे औचित्य साधून आणि छत्रपती शिवाजी महाराजांना मानवंदना म्हणून ‘इट्स मज्जा ओरिजिनल’ व ‘मीडिया वन सोल्यूशन’ प्रेक्षकांसाठी ‘शिवराज रामराज्याचं’ हे स्तुतीगीत घेऊन आले आहेत.
“आलं आलं आलं रं आलं राजं आलं, छत्रपती शिवराज, रामराज्याचं” हे या स्तुतीगीताचे शब्द असून शाहीर प्रसाद विभूते यांनी हे गाणं गायले आहे. तर गीत व संगीतही त्यांनीच दिले आहे. त्याचबरोबर या गाण्यासाठी त्यांना सत्यशील बोरवणकर, हृषीकेश केळकर, भाग्यश्री अभ्यंकर व मयुरा काळे या गायकांची साथ लाभली आहे. अशातच यंदाच्या शिवजयंतीच्या दोन दिवस आधी आज १६ फेब्रुवारी ‘शिवराज रामराज्याचं’ हे स्तुतीगीत प्रदर्शित करण्यात आले आहे.
दरम्यान, ‘शिवराज रामराज्याचं’ या सबंध गाण्यासाठी लाईन आर्ट्स या खास चित्रण शैलीचा वापर करण्यात आला असून हे लाईन आर्ट्स संदीप घोडके यांनी साकारले आहे. तर ‘मीडिया वन सोल्युशन्स’ आणि शौरिन दत्ता यांनी या गाण्याची निर्मिती केली आहे. तसेच अंकिता लोखंडे यांनी क्रिएटीव्ह हेड आणि जैमिन शिगवण व अनंत श्रीवास्तवा यांनी या गाण्यासाठी प्रोजेक्ट हेडची जबाबदारी पार पाडली आहे.
